च्याम्पियन्स लिग फुटबल अन्तर्गत गए राति भएको खेलमा स्पेनिस क्लब बार्सिलोनाले जर्मन क्लब बोरुसिया डर्टमन्डलाई ३–१ गोल अन्तरले हराएको छ । बार्सिलोनाको जितमा लुईस स्वारेज, मेस्सी र एन्टोनी ग्रिजम्यानले समान एक एक गोल गरे । जाडोन साञ्चोले डर्टमण्डका लागि एक गोल फर्काए ।

लियोनल मेस्सीले बार्सिलोनाका जर्सीमा ७ सयौ खेल खेल्दा बार्सिलोना च्याम्पियन्स लिगको नकआउट चरणमा पुग्न सफल रह्यो । ५ खेलबाट ११ अंकको बार्सिलोना एक खेलअघि नै नकआउटमा पुगेको हो ।

अर्जेन्टिनी फरवार्डले च्याम्पियन्स लिगमा १ सय १४ गोल गर्न सफल रहे ।

अर्को खेलमा स्लाभिया प्रागले घरेलु मैदानमा इन्टर मिलानसंग ३–१ गोल अन्तरको हार बेहोर्यो ।

यो खेलपछि इन्टर र बोरुसियाको ७–७ अंक छ । प्रागको २ अंक छ । अन्तिम खेलको नतिजापछि इन्टर र बोरुसियामध्ये एक टिम नकआउटमा पुग्नेछ ।