एसियन भलिबल कन्फेडेरेसन ‘एभिसी’ सेन्ट्रल जोन सिनियर पुरुष भलिबल प्रतियोगिताको पहिलो खेलमै नेपालले नमिठो हार बेहोरेको छ ।
आज भएको पहिलो खेलमा नेपाल किर्गिस्तानसँग ३-० को सोझो सेटमा पराजित भएको हो ।

उपाधिको बलियो दाबेदार किर्गिजस्तानले नेपालमाथि सुरुवातदेखि नै दबाब बनाएको थियो ।
लगनखेलस्थित त्रिभुवन आर्मी क्लबको शारीरिक तालिम तथा प्रशिक्षण केन्द्रको कभर्डहलमा नेपाललाई किर्गिस्तानले २५-२३, २५-२२ र २५-२२ को सेटमा पराजित गर्यो ।
यो जितसँगै किर्गिजस्तान एक खेल अगाडि नै सेमिफाइनलमा प्रवेश गरेको छ ।

हारसँगै नेपाललाई सेमिफाइनलमा पुग्न अन्तिम खेल जित्नै पर्ने भएको छ । अब नेपालले बुधबार माल्दिभ्ससँग खेल्नेछ ।

प्रतियोगिता अन्तर्गत नै ‘समूह बी’को पहिलो खेलमा तुर्कमेनिस्तानले अफगानिस्तानलाई ३-१ को सेटमा पराजित गर्दै विजयी सुरुवात गरिसकेको छ ।

प्रतियोगितामा नेपालसहित बंगलादेश, माल्दिभ्स, अफगानिस्तान, किर्गिस्तान, तुर्किमिनिस्तान र उज्वेकिस्तान गरि ७ टोलीले प्रतिस्पर्धा गरिरहेका छन् ।