स्पेनिस ला लिगा फुटबलमा रियल मड्रिड सुखद सुरुवात गरेको छ ।

गए राति भएको सिजनको पहिलो खेलमा सेल्टा भिगोलाई ३-१ गोल अन्तरले पराजित गर्दै रियलले विजयी सुरुवात गरेको हो ।

सेल्टाको मैदानमा १० खेलाडी सिमित भएपनि रियलले उत्कृष्ट जित निकाल्यो । रियलको जितमा करिम बेन्जिमा, टोनि क्रुस र लुकास भास्क्वेजले एक एक गोल गरे । सेल्टाको इकर लोसडाले एक गोल फर्काए ।

खेलको ५६ औं मिनेटमा लुका मोड्रिचले रातो कार्ड पाउँदा रियल १० खेलाडीमा समेटिएको थियो ।

जितसँगै रियलले ३ अंकबाट सिजनको सुरुवात गरेको छ । सेल्टाले भने हारबाट नयाँ सिजनको सुरुवात गरेको छ ।

वेल अब रियल मड्रिडमै रहने

प्रशिक्षक जिनेदिन जिदानले ग्यारेथ वेल रियल मड्रिडमै रहने बताएका छन् । शनिबार लिगको पहिलो खेलमा सेल्टा भिगोमाथि प्राप्त जितपछि रियल प्रशिक्षक जिदानले सो कुरा बताएका हुन् ।
सेल्टाविरुद्धको जितमा प्रशिक्षक जिनेदान जिदानले ग्यारेथ बेललाई पहिलो रोजाईमा मैदान उतारेका थिए ।

प्रशिक्षकसंगको खराब सम्बन्धका कारण वेलले यसैसिजन क्लब छाड्ने तयारीमा थिए ।