एजेन्सी । साउथ इण्डियन फिल्म साहोको रिलिज मिति सरेको छ । तेलुगू, तमिल र हिन्दी तिन वोटै भाषामा रिलिज गरिने भनिएको यो फिल्म यस अघि अगस्ट १५ अर्थात् साउन ३० गतेमा रिलिज हुने तयारीमा भएता पनि अगस्त ३० अर्थात भदौ ६ गतेका लागी सारिएको छ । निर्माणदेखि चर्चा भइरहेको बाहुबली सुपरस्टार प्रभाष र बलिउड अभिनेत्री श्रद्धा कपुरको नयाँ चलचित्र साहो’लाई यस वर्षको निकै प्रतिक्षित फिल्म मानिएको समयमा चलचित्रको निर्माणको काम नसकिएको भन्दै निर्माण यूनिटले केही समय पछाडी सारेको हो ।

’साहो’ फिल्मका माध्यमबाट प्रभासले बलिउडमा डेब्यु गर्दैछन् । फिल्मको पोस्टर, टिजर र ’साइको सैया’ बोलको गीतले दर्शकमा उत्साह जगाएको छ । यस फिल्मलाई हेर्नका लागि विश्वका दर्शकहरु नै पर्खिराखेका छन् । यी दर्शकहरुलाई निराश गराउने खवर सार्वजनिक भएको छ । फिल्ममा प्रभास र श्रद्धा संग मन्दिरा बेदी, चंकी पाण्डे, नील नितिन मुकेश, महेश मान्जरेकर, मुरली शर्मा र अरुण विजय लगायतका कलाकारहरुको मुख्य अभिनय रहेको छ ।