काठमाडौं । प्रमुख प्रतिपक्षी दल नेपाली कांग्रेसले सरकारले जनताको चाहनाविपरीत बजेट ल्याएको निष्कर्ष निकालेको छ । सिंहदरबारस्थित संसदीय दलको कार्यालयमा बिहीबार बसेको दलको बैठकले सरकारले आगामी आर्थिक २०७६–०७७ का लागि ल्याएको बजेट जनताको चाहना प्रतिकूल हुने गरी आएको निष्कर्ष निकालेको हो ।

कांग्रेस संसदीय दलका प्रमुख सचेतक बालकृष्ण खाँणले बैठकपछि सञ्चारकर्मीसँगको संक्षिप्त कुराकानीमा सरकारले नेपाली जनताको चाहना विपरीत बजेट ल्याएको निष्कर्ष बैठकले गरेको जानकारी दिनुभयो ।
रोजगारीको अवसर बढाउने, मुलुकको विकास, निर्माणको कामलाई तीव्रता दिने, उत्पादन वृद्धि गर्नेभन्दा पनि बजेट जनतालाई थप ऋणको भार थोपर्ने गरी आएको खाँडको टिप्पणी छ । सरकारले बजेटलाई वितरणमुखी शैलीमा ल्याएको टिप्पणी गर्दै उहाँले बजेटले मुलुकलाई जनताले चाहेको जस्तो विकसित र समृद्ध बनाउन नसक्ने दाबी गर्नुभयो ।

सरकारले आफूसँग भएको रकमलाई विकास निर्माणमा र पूँजीगत रुपमा खर्च गर्नुभन्दा पनि चालु खर्च बढ्ने खालको र बजेटको सुरुवातमै एक तिहाइभन्दा ठूलो हिस्सा ऋणको रुपमा ग्रहण गरेर खर्च गर्ने सोच राखेको खाँडको भनाई छ ।
यसबाट जनतामा ऋणको भारी बढ्दै जाने र विकासको प्रतिफल नआउने ठहर कांग्रेसले गरेको छ ।

बैठकले सांसदहरुका लागि विनियोजन गरिएको छ करोड रुपैयाँ बराबरको बजेट दुरुपयोग गरे तत्काल विरोध गर्ने निर्णय गरेको खाँणले जानकारी दिनुभयो ।