काठमाडौँ । आइतबार रातिदेखि परिरहेको वर्षाका कारण विभिन्न खोलाहरुमा बाढी आउँदा सोमबार बिहानैदेखि लमही–घोराही–तुलसीपुर सडकखण्डको यातायात प्रभावित भएको छ ।

ठूला गाडीहरु जोखिम मोलेर पार गरेपनि साना गाडी र मोटरसाइकल भने खोला पार गर्न सकिरहेका छैनन् ।
यात्रा जोखिमपूर्ण भएपछि मानिसहरुको आवतजावत नै अबरुद्ध भएको जिल्ला प्रहरी कार्यलयले जनाएको छ ।

लमही–घोराही–तुलसीपुर सडकखण्डमा पर्ने खोलाहरुमा बाढी आउँदा हरेक वर्षा याममा यात्रा जोखिमपूर्ण हुने गरेको छ ।

लमही–तुलसीपुर यात्रा गर्न १० वटा खोला पारगर्नुपर्ने र तीन किलोमिटरको फरकमा रहेका खोलाहरुमा पुल नभएका कारण आवत जावतमा समस्या आएको छ ।

यस क्षेत्रका बबई, सिस्ने, कटुवा, सेवार, गुज्रे, हापुर, पत्रे, संक्राम, ग्वार र काला खोलामा बाढी आएको छ ।

बबई, कटुवा, गुज्रे, पत्रे, संक्राम र ग्वार खोलामा पुल निर्माण थालिए पनि काम सम्पन्न नहुँदा सास्ती भएको छ ।

ठेकेदार र सडक डिभिजन कार्यालयको लापरवाहीका कारण कामले गति लिन सकेको छैन । पुल बनाउने क्रममा सडक भत्काइएको छ । भरपर्दो डाइभर्सन नबनाउँदा सानो बाढीले पनि यातायात अवरुद्ध हुने गरेको छ ।