चरिकोट । दोलखाको वैत्यश्वर गाउँपालिकामा बोलेरो जीप दुर्घटना हुँदा एक जनाको मृत्यु भएको छ, भने तीनजना घाइते भएका छन् ।
जिल्लाको वैत्यश्वर गाउँपालिका–७ मार्वुबाट धानको भूस लिएर जिरी नगरपालिका–९ तर्फ जाँदै गरेको बा १३ च ६१९६ नं को बोलेरो जीप आज बिहान ४ बजे खावा डाँडा नजिकै दुर्घटना भएको हो ।

दुर्घटनामा परि चालक जिरी नगरपालिका ९ निवासी २० बर्षीय सुवास तामाङको घटना स्थलमै मृत्यु भएको जिल्ला प्रहरी कार्यालय दोलखाले जनाएको छ । जीपको अगाडिको सिसा फुटेर भूइँमा खसेका चालकको सोही जीपले किचेर मृत्यु भएको हो । अन्य तीन जना घाइते भएका छन् ।

बोलेरो जीप लामोसाँघु जिरी सडकखण्ड अन्तर्गत खावास्थित वैत्यश्वर गाउँपालिका ३ र ४ को बीचमापर्ने सडकबाट तल खोल्सामा खसेको थियो ।

दुर्घटनामा परी जिरी नगरपालिका– ९ का २० वर्षीय मंगले तामाङ, ५२ वर्षीय दिलबहादुर तामाङ र वैत्यश्वर गाउँपालिका– १ गैरीमुदीका ५५ वर्षीय कर्णबहादुर तामाङ घाइते भएका छन् ।

घाइते सबैको मैनापोखरीस्थित दाहाल मेडिकलमा उपचार भइरहेको र उनीहरूको अवस्था सामान्य रहेको प्रहरीले जनाएको छ ।