काठमाडौं । एक्सनमा प्रतीक्षित भनिएको फिल्म वीरांगनाको ट्रेलर सार्वजनिक गरिएको छ । सामाजिक सञ्जाल साईराम पिक्चर्सको युट्युब च्यानलबाट निर्माण पक्षले फिल्मको ट्रेलर सार्वजनिक गरिएको हो । यही असारको अन्तिममा रिलिज हुन लागेको फिल्मले पोस्टर र दुई गीत सार्वजनिक गरिसकेको छ ।

फिल्मको सार्वजनिक ट्रेलरमा मुख्य कलाकारहरू शिल्पा पोखरेल, अनुपविक्रम शाही, पृथ्वीराज प्रसाईदेखि घोडा र बाँदरसम्म फिचरिङ गरिएको छ । फिल्मको ट्रेलरमै प्रज्वल गिरी, सुशील पोखरेल, धु्रव कोइराला, प्रिया रिजाललगायतलाई पनि देख्न सकिन्छ ।

महिला सशस्त्र प्रहरीको वीरतामा आधारित फिल्म वीरांगना लभस्टोरी एक्सन जनरामा निर्माण गरिएको फिल्म हो । राजबहादुर सानेको लेखन तथा निर्देशन रहेको फिल्म वीरांगना फोर्थ आई मुभिजको ब्यानरमा बाबुराम दास, श्यामबहादुर थापा, रघु परियार, देव तामाङ र विमला भट्टले निर्माण गरेका हुन् । वीरांगनामा सुमी चामलिङ राई सहनिर्माता रहेकी छिन् । फिल्ममा धीरेन शाक्य, कृष्ण शिवाकोटी, देव तामाङ, अंशु थापा, अमृत सापकोटालगायतको पनि अभिनय रहेको छ ।

फिल्ममा दीपक शर्मा र पुरुषोत्तम न्यौपानेको संगीत, कविराज गहतराज र सुरेन्द्र बसेलको कोरियोग्राफी, श्री श्रेष्ठको द्वन्द्व निर्देशन तथा हरि घले लामा र रामेश्वर कार्कीको छायांकन रहेको छ । फिल्मलाई काठमाडौंमा बीके फिल्मका गोपाल कायस्थ र काठमाडौं बाहिर एफडी कम्पनीले वितरण गर्ने भएका छन् ।