नयाँ दिल्ली । ख्यातिप्राप्त कवि एवं लेखक बसन्त चौधरीको पछिल्लो कविता संग्रह ‘चाहतो के साये मे’ नयाँ दिल्लीमा विमोचन गरिएको छ । बलिउडका बरिष्ठ गीतकार समीर ‘अन्जान’ ले गत शुक्रबार उक्त कविता संग्रहको विमोचन गरेका हुन् । गीतकार समीर बलिउडका त्यस्ता गीतकार हुन् जसको नाम संसारमै सबैभन्दा धेरै संख्यामा गीत लेखेवापत सन् २०१६ को गिनिज वल्र्ड रेकर्डमा उल्लेख गरिएको छ ।

नयाँ दिल्लीस्थित होटल हयात रिजेन्सीको सभाहलमा उपस्थित भारतीय साहित्य क्षेत्रका मुर्धन्य व्यक्तित्वहरूले कवि चौधरीको नयाँ पुस्तकको खुलेर प्रशंसा गरे । पछिल्लो एक वर्षको दौरानमा सार्वजनिक भएको चौधरीको यो दोस्रो पुस्तक हो । ‘चाहतो के साये मे’ लाई ख्यातिप्राप्त ‘बेनेट कोलम्यान एन्ड कम्पनी लिमिटेड’ अन्तर्गतको ‘टाइम्स ग्रुप बुक्स’ले प्रकाशन गरेको हो । २४२ पृष्ठको पुस्तकमा चौधरीले हिन्दी र उर्दु मिश्रित मिठासपूर्ण सरल भाषाका लेखेका कविता, गीत, गजल तथा नज्माहरूलाई समेटिएका छन् ।

उक्त पुस्तकको साथमा चौधरीद्वारा लिखित विभिन्न सातवटा गीत समेटिएको सिडी पनि सार्वजनिक गरिएको थियो । ती गीतहरूमा बलिउडका चर्चित गायक/गायिका सोनु निगम, श्रेया घोषाल, रुपकुमार राठोड र मोहित चौहानको स्वर रहेको छ । कार्यक्रमका दौरानमा केही गीतको म्युजिक भिडियो समेत प्रदर्शन गरिएको थियो ।

पुस्तक विमोचन पछि मुख्य अतिथि गीतकार समीरले कवि चौधरीको पुस्तक सरल र श्रोतामुखी रहेको टिप्पणी गरे । उनले मनलाई छुने काब्य कृति रचना गरेको भन्दै चोधरीलाई धन्यवाद दिए । “अझै पनि साहित्यको दुनियाँमा चलचित्रका गीतकारहरूलाई स्वीकार नगरिनु दुःख लाग्दो विषय हो । गुलजार साहेव (भारतका लोकप्रिय गीतकार, कवि एवं फिल्म निर्देशक) ले मलाई आफ्नो गीतहरूको संग्रह प्रकाशन गर्न सुझाव दिदै आउनुभएको छ र म पनि त्यसबारेमा सोचिरहेको छु”, उनले भने ।

पुस्तक विमोचन कार्यक्रममा भारतको उत्तराखण्ड राज्यका पूर्व मुख्यमन्त्री रामेश पोखरियाल ‘निशक’ विशिष्ट अतिथीको रुपमा उपस्थित थिए । स्वयं कवि समेत रहेका निशकले नेपाल र उत्तराखण्डबीच सीमा जोडिएकाले विशेष निकटता रहेको चर्चा गर्दै दुबै ठाउँमा रहेका साझा संस्कृति र पहाडी भुभागको विशिष्टपनको उल्लेख गरे । कवि चौधरीको पुस्तक नेपाल–भारत सम्बन्ध बलियो बनाउने दिशामा एक महत्वपूर्ण कदम भएको उनको कथन थियो ।

भारतका बरिष्ठ कवि, साहित्य समीक्षक एवं समालोचक बालस्वरुप राही तथा दिल्ली विश्वविद्यालय अन्तर्गतको हंसराज कलेजकी प्राचार्य डा. रमाले ‘चाहतो के साये मे’ माथि विद्धत टिप्पणी गरेका थिए ।

अन्त्यमा पुस्तकका लेखक चौधरीले ‘चाहत’ (इच्छा) शब्दको विविध आयामबारे प्रकाश पार्दै भने, “धेरै जसो मेरा काव्य सिर्जनालाई प्रेम र इच्छाले डोर्याउँदै आए पनि इच्छा वा चाहत स्त्री र पुरुषबीचको प्रेममा मात्र सीमीत नभएर त्यो भन्दापनि पर रहेको छ । यसले समानरुपमा कुनै पनि व्यक्तिको नयाँ उचाईमा पुग्ने र नयाँ लक्ष्य प्राप्त गर्ने आकांक्षालाई समेत प्रतिविम्वित गर्दछ । यसर्थ इच्छा भनेको मानिसको समग्र जीवन प्रगतिको मुख्य उत्प्रेरक तत्व हो ।”

कवि चौधरी तथा कार्यक्रमका वक्ताहरूले कविताहरुको भाव दुरुस्त प्रकट हुनेगरी ‘चाहतो के साये मे’लाई अंग्रेजीमा अनुवाद गरेको भन्दै जार्काताका सुन्जोय शेखरको खुलेर प्रशंसा गरे । ‘चाहतो के साये मे’ लाई यही असार ११ गते भारतको मुम्बईमा समेत विमोचन गरिने टाइम्स ग्रुप बुक्सले जनाएको छ ।