काठमाडौं । कृषि, भूमि, व्यवस्था तथा सहकारी मन्त्री चक्रपाणि खनालले बालाजुमा रहेको आधुनिक डेरी प्रोडक्ट, शुलभ कृषि डेरी र डीडीसी दूधको उत्पादन केन्द्रमा छापा छापा मारेका छन् ।

गुणस्तरहिन दूध र दूधजन्य बस्तुहरुको बिक्रि वितरण भइरहेको समाचार आइरहेका बेला मन्त्री खनालले सोमबार बिहान बालाजुमा रहेको तीन वटै दूध डेरीको उत्पादन केन्द्रको अनुगमन गरेका हुन् ।

अनुगमनका क्रममा आधुनिक डेरी प्रोडक्ट र सुलभ डेरीको पाउडरको गोदाम न्यूनतम मापदण्ड भित्र पनि नरहेको पाइएपछि सील गरिएको छ । कुनै मापदण्ड पूरा नगरेको पाइएपछि दुवै डेरीको पाउडर गोदाम सील गर्नु परेको मन्त्री खनालले बताए ।

त्यसैगरी डीडीसी दूधको पनि गुणस्तर परीक्षण गर्ने र मापदण्ड पूरा नगरेको पाइए कडा कारबाही गर्ने मन्त्री खनालको योजना छ । मन्त्री खनालले तीन वटै दूधको ३० वटा स्याम्पल परीक्षणका लागि लगिएको र त्यसमा गुणस्तर नभएको पाइए भोलिबाटै आवश्यक कारबाही प्रक्रिया अघि बढाउने चेतावनी पनि दिए ।

मन्त्रीसँग पुगेका खाद्य प्रविधि तथा गुण नियन्त्रण विभागका अधिकारीहरुले ३ वटै दूध डेरीका करिब ३० वटा स्याम्पल पिस परीक्षणका लागि लिएका छन । ती दूधको परीक्षण सोमबार नै हुने र गुणस्तरहिन देखिए भोलिबाटै कारबाही प्रक्रिया अघि बढाउने मन्त्री खनालले स्पष्ट पारे ।

मन्त्री खनालले नागरिकको स्वास्थ्यमाथि खेलबाड गर्ने गरी खाद्य बस्तु उत्पादन गर्नेमाथि खाद्य सम्प्रभूता ऐन अन्तरगत कडा कारबाही गर्ने पनि चेतावनी दिए । सरकारले नागरिकको स्वास्थ्यमाथि खेलबाड गर्ने जो कोही पनि कारबाहीको दायरामा ल्याउने उनको भनाई छ । मन्त्री खनालले डेरीहरुमा प्रयोग गरिएको पाउडर परीक्षण गरेपछि मात्रै गोदाममा लगाइएको सील खोलिने उनले बताए ।