काठमाडौं । तत्कालीन माओवादी केन्द्रको तर्फबाट स्थायी कमिटीमा समावेश गर्नुपर्ने १९ जनाको नाम टुंगो नलागेका कारण नेपाल कम्युनिस्ट पार्टीको स्थायी कमिटीले पूर्णता पाउन सकेको छैन । ४५ सदस्यीय स्थायी कमिटीमा तत्कालीन एमालेबाट रहने २६ जनाको टुंगो लागिसकेको छ ।तत्कालीन माओवादी केन्द्रको तर्फबाट १९ जनाको नाम टुंगो लगाउन नसकिएको नेकपाकी नेता पम्फा भुसालले बताइन् । स्थायी कमिटीमा पर्नका लागि नेताहरुले प्रचण्डमाथि दबाव पारेका छन् । प्रचण्डले स्थायी कमिटी सदस्य छान्न नसकेका कारण पूर्णता पाउन नसकेको एक सचिवालय सदस्यले बताए ।

पूर्वमाओवादीबाट पुष्पकमल दाहाल, नारायणकाजी श्रेष्ठ, रामवहादुर थापा बादल हाइकमाण्ड सदस्य छन् । त्यस्तै टोपवहादुर रायमाझी, देव गुरुङ, गिरिराजमणि पोखरेल, वर्षमान पुन, हरिवोल गजुरेल, शक्ति बस्नेत, जनार्दन शर्मा, पम्फा भुसाल, अग्नि सापकोटा, मात्रिका यादव विगतको वरिष्ठताका आधारमा स्थायी कमिटीमा पर्ने निश्चित छ ।बाँकी ६ जनामा पर्न करीब एक दर्जन नेताहरुको प्रतिस्पर्धा छ । अमिक शेरचन स्थायी आमन्त्रित सदस्य हुने भएका छन् ।

बाँकी ६ जनाभित्र पर्न लिलामणि पोखरेल, मणि थापा, देवेन्द्र पौडेल, चन्द्रप्रसाद खनाल, कुलप्रसाद केसी, राम कार्की, हितमान शाक्य, तिलक परियार, लेखराज भट्ट, रामचन्द्र झालगायतका नेताहरुको नाममा छलफल भइरहेको स्रोतले जनाएको छ ।