काठमाडाै‌ । इन्डियन प्रिमियर लिग, आइपिएल क्रिकेटको फाइनलमा स्थान बनाउने खुड्किलोको रुपमा रहेको एमिनेटरमा राजस्थान रोयल्स चुकेको छ । कोलकातामा बुधबार बेलुका भएको खेलमा घरेलु टोली कोलकाता नाइट राइडर्ससँग २५ रनले पराजित हुँदै राजस्थान बाहिरिएको छ ।

यसको अर्थ कोलकाताले अब फाइनल प्रवेशका लागि बिहीबार हुने दोस्रो क्वालिफायरमा सनराइजर्स हैदरावादसँग प्रतिस्पर्धा गर्नेछ ।  यो खेलमा विजयी हुने टोलीले उपाधिका लागि चेन्नई सुपर किंग्ससँग प्रतिस्पर्धा गर्नु पर्नेछ ।

कोलकाताले प्रस्तुत गरेको १७० रनको लक्ष्य पछ्याएको राजस्थानले निर्धारित २० ओभरमा चार विकेटको क्षतिमा १४४ रन मात्रै बनायो ।  उसका लागि अजिन्क्या राहाणेले ४६, सञ्जु सामसोनले ५० तथा राहुल त्रिपाठीले २० रन बनाए पनि त्यो जितका लागि पर्याप्त भएन ।

त्यसअघि ब्याटिङ्ग गरेको कोलकाताले सात विकेटको क्षतिमा १६९ रन बनाएको थियो । उसका लागि कप्तान दिनेश कार्तिकले ५२, आन्द्रे रुसेलले नटआउट ४९ तथा शुबमन गिलले २८ रनको योगदान दिए ।