पर्वत । पर्वतको कुश्मा नगरपालिका –७, दोविल्लामा शुक्रबार बिहान १२ बजे यात्रुबहाक बस दुर्घटना भएको छ । दुर्घटनामा परि बसमा सवार २५ जना यात्रु ध्ये १५ जना यात्रु घाइते भएका छन् ।

बागलुङदेखि पोखरातर्फ जाँदै गरेको ना ३ ख ७७४० नम्बरको यात्रुवाहक बस पोखरा बागलुङ–राजमार्गको दोविल्ला खण्डमा दुर्घटना भएको थियो । दुर्घटनामा परी घाइते हुनेहरुमा अधिकांश बागलुङको जैमिनी नगरपालिका र बागलुङ नगरपालिकाका यात्रुहरु रहेका छन् भने कास्की, तनहुँ, पर्वत लगायतका यात्रु पनि सामान्य घाइते भएको जिल्ला प्रहरी कार्यालय पर्वतले जनाएको छ ।

घाइते सवैजनाको घटनास्थलबाट उद्धार गरी पर्वत जिल्ला अस्पतालमा उपचार भइरहेको छ । घाइतेहरुको टाउको, खुट्टा र शरिरका विभिन्न भागमा चोट लागे पनि खासै गम्भीर नरहेको पर्वत जिल्ला अस्पतालले जनाएको छ ।

सडकमा विपरीत दिशाबाट आइरहेको ट्याक्सीलाई उछिन्न खोज्दा दुर्घटना भएको जिल्ला ट्राफिक कार्यालय पर्वतले जनाएको छ । बस सडकबाट झण्डै २० मिटर तल खसेको छ । बसका चालक फरार रहेको र खोजीकार्य भइरहेको प्रहरीले जनाएको छ ।