बेइजिङ, चिनियाँ विदेशमन्त्री वाङ यीले उत्तर कोरिया र अमेरिकालाई वार्तागर्न आग्रह गरेका छन् ।आज बेइजिङमा आयोजित पत्रकार सम्मेलनमा उनले सो आग्रह गरेका हुन् । चिनियाँ विदेश मन्त्रालयको नियमित पत्रकार सम्मेलनका क्रममा दुई देशले जतिसक्दो चाँडै शान्तिवार्ता गर्दा राम्रो हुने यीले बताएका हुन।

विदेशमन्त्री यीले उत्तर कोरियाको परमाणुअस्त्र कार्यक्रमका बारेमा पनि दुई देशले वार्तागरी आफ्ना कुरा राख्नुपर्नेमा जोड दिँदै आएका छन् ।दक्षिण कोरियाका दुई जना विशेषदूत बिहीबारै संयुक्त राज्य अमेरिका प्रस्थान गरेलगत्तै यता चिनियाँ विदेशमन्त्रीको यो प्रतिक्रिया आएको छ । त्यसैले उनको यो आग्रहलाई अर्थपूर्ण रुपमा लिइएको छ ।

दक्षिण कोरियाका राष्ट्रपति मुन जाय–इनका विशेषदूतका रूपमा राष्ट्रिय सुरक्षा सल्लाहकार तथा राष्ट्रपतिको कार्यालयका राष्ट्रिय सुरक्षा प्रमुख चुङ इयु–योङ र अर्का एकजना दक्षिण कोरियाको गुप्तचर निकायका प्रमुख आज अमेरिकाका लागि प्रस्थान गरेका हुन् ।उनीहरुले संयुक्तराज्य अमेरिकाका सुरक्षा र गुप्तचरसम्बन्धी उच्च अधिकारीहरुका साथै अमेरिकी विदेशमन्त्री रेक्स टिलर्सनसँग भेटवार्ता गरी हालैको प्योङयाङ भ्रमणका बारेमा जानकारी गराउने बताइएको छ ।