ज्यामिरे (तेह्रथुम) — भर्खर २७ वर्ष लाग्दै गरेकी छथर गाउँपालिका ३ ज्यामिरेकी सबिना लिम्बूले ७ सन्तान जन्माइसकेकी छन् । उनको पहिलो सन्तान ८ वर्षको मात्र भयो । त्यसयता लिम्बूले बर्सेनि ६ सन्तानलाई जन्माइन् । २ जनाको भने मृत्यु भइसक्यो ।

सोही गाउँकी पेक्चीमाया लिम्बू अहिले ४२ वर्षकी भइन् । यो उमेरमा उनले १७ सन्तानलाई जन्म दिएकी छन् । कलिलै उमेरमा धनकुटाको चौबीसे क्षेत्रबाट विवाह गरेर आएकी उनले निरन्तर सन्तान जन्माइरहिन् । जन्मिएका १७ मध्ये ७ जनाको बाल्यावस्थामै मृत्यु भयो । बर्सेनिका १० छोराछोरी भने जीवितै छन् । बर्सेनि सन्तान जन्माउँदा उनको शरीर कमजोर भएको छ । सुत्केरीमा पनि उनले मीठो मसिनो र पोसिलो खानेकुरा खान पाइनन् ।