उदयपुर र गुल्मीमा भएका सवारी दुर्घटनामा ११ जनाको मृत्यु भएको छ । उदयपुरबाट ओखलढुंगा जादै गरेको ना १ ज ३४०४ नम्बरको टाटा सुमो कटारी नगरपालिका–११ ठाटी भन्ज्याङमा दुर्घटना हुँदा ४ जनाको मृत्यु भएको छ । उनीहरुको सनाखत हुन सकेको छैन ।

१० जना सवार सो टाटासुमो सडकबाट करिब ४ सय फिट तल खसेको जिल्ला प्रहरी प्रमुख एसपी नवराज भट्टले बताए । जीपमा सवार अन्यको अवस्था थाहा हुन सकेको छैन । उद्धारका लागि प्रहरी टोली घटनास्थल तर्फ गएको सहकर्मी डिल्लीराम खतिवडाले जनाएका छन् ।

यता, बुटवलबाट गुल्मी सदरमुकाम तम्घास जाँदै गरेकोबस दुर्घटना हुँदा सात जनाको मृत्यु भएको छ । ६ जना घाइते भएका छन् । बा ४ ख ५५०१ नम्बरको बस गुल्मीको गुल्मी–दरबार गाउँपालिका ४ मा सडकबाट तल खसेको थियो । घटनास्थल सदरमुकामबाट टाढा रहेको र उद्धारका लागि प्रहरी जाँदै गरेकाले विस्तृत विवरण आउँन बाँकी छ ।