काठमाडौं । चन्दननाथ माध्यमिक विद्यालयको नवनिर्मित भवन उद्घाटनका लागि आज राष्ट्रपति विद्या भण्डारी जुम्ला जाने भएकी छन् ।राष्ट्रपति भण्डारी नेपाली सेनाको हेलिकोप्टरबाट ९ः३० बजे जुम्ला पुग्ने कार्यक्रम रहेको आयोजक चन्दनाथ मावि जुम्लाका प्रधानाध्यापक टंकबहादुर महतले जानकारी दिए ।

राष्ट्रपति भण्डारी जुम्ला पुगेपछि शुरुमा चन्दननाथ भैरवनाथ बाबाको दर्शन गर्ने कार्यक्रम रहेको प्रधानाध्यापक महतले बताए । त्यसपछि १०ः३० बजे राष्ट्रपति भण्डारीबाट जुम्लाको विज्ञान प्रयोगशालाको समुद्घाटन गर्ने कार्य तालिका छ, उनले भने ।

राष्ट्रपति भण्डारीले हिमाली क्षेत्रमा स्थापित उच्च पर्वतीय कृषि अनुसन्धान प्रतिष्ठान (मारी) र त्यसअन्तर्गत गुठीचौर भेडाबाख्रा अनुसन्धान, बागवानी विकास अनुसन्धान र कृषि अनुसन्धान केन्द्र, विजयनगर, जुम्लाले हालसम्म गरेका गतिविधिको प्रदर्शनी अवलोकन गर्ने प्रतिष्ठान (मारी) का निर्देशक नेत्रहरि घिमिरेले जानकारी दिए ।

राष्ट्रपति भण्डारी जुम्लामा पुग्ने भएपछि सुरक्षा व्यवस्थालाई कडा बनाइएको निमित्त प्रमुख जिल्ला अधिकारी टेकबहादुर बुढ्थापाले जानकारी दिए ।