धादिङको बेनिघाट रोराङ गाउँपालिका वडा नम्बर ९ खटौटीमा आज यात्रु बाहक बस र ट्रक ठोक्किँदा ३१ जना घाइते भएका छन् । महोत्तरीबाट काठमाण्डौ आउँदै गरेको ना ५ ख ५०२ नम्बरको बस र विपरित दिशाबाट जाँदै गरेको ना ६ ख १२४ नम्बरको ट्रक ठोक्किएर दुर्घटना भएको इलाका प्रहरी कार्यालय गजुरीका प्रहरी निरीक्षक बरुण सिंहले जानकारी दिए ।

दुर्घटनामा बस र ट्रक दुबैका चालकसहित ३१ जना घाइते भएको प्रहरीले जनाएको छ । घाइतेहरुको उपचार राजमार्ग सामुदायिक अस्पताल मलेखु र प्राथमिक स्वास्थ्य केन्द्र गजुरीमा भइरहेको छ । गम्भीर घाइते तीन जनालाई थप उपचारका लागि काठमाण्डौ ल्याइएको छ । दुबै गाडीका चालक घाइते भएकाले दुर्घटनाका कारण खुलेको छैन ।