इलाम । इलामको देउमाई नगरपालिकामा ‘अलैंँची ब्लक’ कार्यक्रम सञ्चालन गरिएको छ । प्रधानमन्त्री कृषि आधुनिकीकरण परियोजनाअन्तर्गत सरकारको रू ५१ लाख ३४ हजार तथा सहकारीको रू २० लाख ४९ हजारको लागतमा उक्त कार्यक्रम सञ्चालन गरिएको हो ।

जिल्ला कृषि विकास कार्यालयका वरिष्ठ कृषि विकास अधिकृत रामसोगारथ शाहका अनुसार सो परियोजनामार्फत ट्रयक्टर, मिनी पावर ट्रिलर, घाँस टुक्र्याउने मेसिन, पानी तान्ने मोटरलगायत सामाग्री उपलब्ध गराइएको छ ।

देउमाई नगरपालिकाका प्रमुख सूर्य पोख्रेलले ब्लक परियोजनाले कृषिको आधुनिकीकरणमा सहयोग पुग्ने बताए । परियोजनाअन्तर्गत नर्सरी स्थापना, प्लास्टिक पोखरी, कस्टम हायरिङ सेन्टर तथा तालिम केन्द्र स्थापना गरिने कार्यालयले जनाएको छ ।