काठमाडौं । गृह मन्त्रालयले लागुऔषधसँग सम्बन्धित नै नभएका कार्मचारीलाई तालिमका लागि विदेश पठाउने गरेको छ। तर,लागु औषधसम्बन्धी अपराध अनुसन्धान गर्ने प्रहरी भने तालिम र स्रोत–साधनको अभावमा छन्। गृहअन्तर्गतको राष्ट्रिय परिचयपत्र व्यवस्थापन केन्द्रका कर्मचारीको लागुऔषधको सम्बन्धमा कुनै सरोकार हुँदैन। अध्यागमन कार्यालयका कर्मचारीको पनि यो कार्यक्षेत्र पर्दैन। तर, गृहले तिनै कार्यालयका कर्मचारीलाई लागु औषधसम्बन्धी तालिममा विदेश पठाएको हो।

अपराध अनुसन्धानका लागि स्रोत–साधन र तालिम अभाव भएको प्रहरी अधिकारीहरूले गुनासो गर्दै आएका छन्। तर, गृह मन्त्रालयले प्रहरीले लिने तालिममा समेत कर्मचारीलाई पठाउँदै आएको छ। भारतको नयाँदिल्लीमा हाल भइरहेको अपराध अनुसन्धानसम्बन्धी तालिममा पनि अधिकांश गृहकै कर्मचारी गएका छन्। राष्ट्रसंघको लागुऔषध तथा अपराधसम्बन्धी कार्यालयले गरेको कानुन कार्यान्वयन अधिकृत तथा फरेन्सिक विज्ञसम्बन्धी तालिममा प्रहरीलाई दुई कोटा मात्र दिइएको छ ।

गृहका पाँच कर्मचारी गएका छन्। गृहका सहसचिव कृष्णबहादुर राउत, उपसचिव फणिन्द्रमणि पोखरेल, अधिकृतहरू सीता घिमिरे, नारायण अर्याललगायतका कर्मचारी सो तालिममा गएका हुन्। नयाँ पत्रिका दैनिकमा समाचार छ।