काठमाडौं । नेपाली सेनाले आफूसँग भएका सैनिक जहाजबाट शुल्क लिएर व्यापारिक चार्टर उडान भर्ने भएको छ । रक्षा मन्त्रालयले नेपाली सैनिक विमान चार्टर उडान विकास समिति गठन आदेश २०७३ जारी गरेपछि सेनाले व्यापारिक प्रयोजनमा समेत आफ्ना हेलिकोप्टर र जहाजबाट चार्टर उडान गर्ने भएको हो ।  रक्षा मन्त्रालयले जारी गरेको गठन आदेश राजपत्रमा प्रकाशित भएपछि नेपाली सेनाले विधिवत् रूपमा व्यापारिक उडान सुरु गर्नेछ। उक्त गठन आदेश राजपत्रमा प्रकाशित हुने प्रक्रियामा रहेको  छ ।

रक्षा मन्त्रालयले २०३६ सालमा गठन भएको शाही नेपाली सैनिक विमान सेवा व्यापारिक उडान विकास समितिका कतिपय प्रावधान स्पष्ट नभएकाले त्यसलाई खारेज गर्दै असार २ मा नयाँ विकास समितिलाई मूर्त रूप दिएको हो । अघिल्लो आदेशअनुसार व्यापारिक उडानबाट आएको आम्दानीको पारदर्शिता र राजस्वबारे विवाद भएपछि सेनाले व्यापारिक उडान रोकेको थियो। सेनाले व्यापार गर्न नपाउने भन्दै विवाद भएपछि उद्धार तथा भीआईपी सवारीबाहेकका काममा नेपाली सेनाले सैनिक जहाजको प्रयोग बन्द गरेको थियो । नेपाली सेनाको हवाई महानिर्देशनालयमा एउटा सुपर पुमा, दुईवटा एलुएट, तीनवटा एमआई १७, दुईवटा इक्वेरल, दुईवटा वेल र एउटा एलएच गरी ११ वटा हेलिकोप्टर चालू अवस्थामा छन् भने एउटा अर्को स्काई ट्रक सञ्चालनमा छ। भारतले अनुदानमा दिएको एउटा हेलिकोप्टर भने बिग्रिएर थन्किएको छ ।

रक्षा मन्त्रालयले अहिले फेरि नयाँ समिति बनाएर सैनिक जहाजलाई व्यापारिक उडान भर्न दिने निर्णय गरेको हो। रक्षा मन्त्रालयका प्रवक्ता शिवप्रसाद सिम्खडाले सैनिक जहाजले चार्टर उडान गर्न पाउनेबारे गठन आदेश जारी भएको बताए। सिम्खडाले भने, ‘आदेश राजपत्रमा छापिने प्रक्रियामा छ। त्यसपछि लागू हुन्छ।’ उनले अबउप्रान्त सैनिक जहाजहरूले निर्बाध रूपमा व्यापारिक प्रयोजनले उद्धार, विकास र अन्य महत्वपूर्ण कामका लागि उडान भर्न पाउने बताए। मन्त्रालयले सैनिक जहाजको उडानलाई व्यवस्थित बनाउन कार्यविधिसमेत तयार पार्नेछ। आजको अन्नपूर्णमा समाचार छ ।