विराटनगर। एकीकृत नेकपा (माओवादी)का अध्यक्ष पुष्पकमल दाहालले राष्ट्रिय सहमति, एकता र सहकार्य आजको आवश्यकता भएको बताएका छन् ।  

विराटनगर विमानस्थलमा आज दिउँसो सञ्चारकर्मीसँग कुराकानी गर्दै उनले असन्तुष्ट पक्षहरुका मागलाई सम्बोधन गर्न र मुलुकका चुनौतीहरुको सामना गर्न राष्ट्रिय एकता अपरिहार्य रहेको स्पष्ट पारे ।  

पत्रकारको जिज्ञासामा बेलायतको संसद्मा नेपालबारे छलफल हुनुलाई आफूले स्वाभाविक नठानेको पनि उनले बताए ।  नेपालको आन्तरिक मामिलाबारे कुनै पनि मुलुकले बोल्नु राम्रो नभएको उनको भनाइ थियो । 

सरकार परिवर्तन गर्ने अहिले कुनै सोचाइ नरहेको उल्लेख गर्दै उनले संविधान कार्यान्वयन र पुनःनिर्माणका कामतर्फ सबै दल केन्द्रित हुनुपर्ने बताए ।