काठमाडौं । कांग्रेसका तत्कालीन नेता गिरिजाप्रसाद कोइालाको योजनामा ४२ वर्ष अघि अपहरण गरिएको जहाज सुन्दरीजलस्थित वीपी  संग्रहालयमा राखिने भएको छ। 

संग्रहालयका संरक्षक परशुराम पोखरेलले २ वर्ष अघि अर्घाखाँचीको मसिने लेकमा दुर्घटनामा परेर क्षतिग्रस्त विमानलाई संग्रहालयमा राखिने जानकारी दिए। ‘राष्ट्रिय विमा संस्थानसँग विमा गरिएकाले कानुनी प्रक्रिया गर्नुपर्ने रहेछ,’उनले भने,‘सबै प्रक्रिया अन्तिम चरणमा पुगिसकेको छ, संस्थानले अनुमति दिइसकेको छ, कागजी प्रक्रिया पूरा भएपछि ल्याउँछौं।’
 
विराटनगरबाट काठमाडौंका लागि उडेको नेपाल एयरलाइन्सको विमानलाई कांग्रेसद्वारा गठित मुक्ति सेनका लागि आर्थिक स्रोत जुटाउन २०३० साल जेठ ३० गते बसन्त भट्टराई र दुर्गा सुवेदीले अपहरण गरेका थिए। अपहरित उक्त विमानलाई बिहारको फारबिसगन्जस्थित घाँसे विमानस्थलमा अवतरण गराइएको थियो। 
 
विमानमा ३० लाख रुपैयाँ रहेको सूचना पाएपछि वीपी कोइराला र गिरिजाप्रसाद कोइरालाको योजनामा विमान अपहरण गरिएको थियो। विमान अपहरणमा दिवंगत सुशील कोइरालाको समेत सहभागीता रहेको थियो। कान्तिपुर दैनिकमा समाचार छ।