फलेवास। बर्षाममा मोदी खोलामा आएको बाढीले क्षति पुर्याउँदा बन्द रहेको पर्वतको चुवास्थित १० मेगावाट क्षमताको तल्लो मोदीखोला–१ जलविद्युत् आयोजनाबाट आधा क्षमतामा मात्र विद्युत् उत्पादन भएको छ । 

आयोजनाले चार महिनापछि आधा क्षमतामा विद्युत् उत्पादन सञ्चालन गरेको हो । साउन १३ गते आएको बाढीले क्षतिग्रस्त भएको विद्युत्गृह र उपकरणको मर्मत गरिएपछि यसै सातादेखि एउटा टर्वाइनबाट मात्र उत्पादन सुरु गरी राष्ट्रिय प्रसारण लाइनमा जोडिएको छ । 

मुलुकभर इन्धन अभाव र विद्युत्भार कटौतीको मार खेपिरहेको अवस्थामा आयोजनाले पाँच मेगावाट विद्युत् केन्द्रीय प्रसारणमा थपेको हो । मोदीखोलाको बाढी विद्युत्गृहमा पसेपछि त्यहाँ रहेका इलेक्ट्रिक र इलेक्ट्रो मेकानिकल सबै सामानमा क्षति पुगेको थियो । क्षतिग्रस्त विद्युत्गृह र अन्य संरचना मर्मत गरी एउटा टर्वाइनबाट विद्युत् उत्पादन सञ्चालन गरिएको आयोजनाका निर्देशक उपेन्द्र गौतमले जानकारी दिए। 

मोदीखोलामा साठी वर्षपछि आएको ठूलो बाढीले आयोजनाको विद्युत्गृह, सडक र नहरमा गरी ३० करोडभन्दा बढी क्षति पु¥याएको थियो । विद्युत्गृहको सुरक्षाका लागि लगाइएको पर्खाल भत्काएर मोदीखोलाको बाढी विद्युत्गृहमा पसेपछि सबैभन्दा ठूलो क्षति पुगेको थियो । विद्युत्गृह पानीले भरिएपछि सबै सामान काम नलाग्ने अवस्थामा पुगेका थिए । विद्युत्गृहमा दुई मिटरभन्दा बढी पानीको सतह पुगेपछि जेनेरेटर, टर्वाइन, प्यानल बोर्डमा समेत पानी भरिएको थियो । 

दोबिल्लाको सुन्दरेखोला नहरमा पसेका कारण नहर धेरै ठाउँमा पुरिएको थियो भने स्विचयार्डदेखि विद्युत्गृहसम्म जाने बाटो नदीले कटान गरेको थियो । निजी क्षेत्रको युनाइटेड मोदी हाइड्रोपावर लिमिटेडले निर्माण गरेको उक्त आयोजनाले तीन वर्ष पहिलेदेखि विद्युत् उत्पादन थालेको थियो । आयोजनामा बाढीले क्षति पु¥याएपछि साउनको दोस्रो सातादेखि मङ्सिर दोस्रो साता्सम्म विद्युत् उत्पादन बन्द हुँदा उत्पादनतर्फ मात्रै रु १२ करोडभन्दा बढी नोक्सानी भएको गौतम बताउछन् । उनका अनुसा एक महिना विद्युत् बन्द हुँदा रु चार करोड घाटा हुन्छ ।