सुरुङगा । कानुन न्याय तथा संसदीय व्यवस्था मन्त्री अग्नि खरेलले मधेसवादी दलको जारी आन्दोलनबीच सीमाङ्कनको विषय टुङ्गो लाग्न नसक्ने बताएका छन् ।

आज प्रेस चौतारी झापाले विर्तामोडमा आयोजना गरेको पत्रकार सम्मेलनमा बोल्दै मन्त्री खरेलले नाकामा अवरोध गरिरहेको मधेसवादी दलसँग सहमति जुट्न नसक्ने बताएका हुन् ।

उपयुक्तताको आधारमा छलफल गरी सीमाङ्कनको विषय टुङ्ग्याउन सकिने बताउँदै उहाँले आन्दोलनको स्वरुप परिर्वतन गर्न मधेसवादी दललाई आग्रहसमेत गरे । मधेसवादी दलको चार महिनादेखि जारी आन्दोलनले सबैभन्दा बढी त्यहीँका जनता मारमा परेको उल्लेख गर्दै एमालेका प्रमुख सचेतकसमेत रहनुभएका मन्त्री खरेलले आन्दोलन फिर्ता गरेर समस्या समाधानमा अग्रसर हुन सुझाव दिए ।

भर्खरैमात्र चीन भ्रमण सकेर स्वदेश फर्कनुभएका खरेलले नेपाल छिमेकीसँगको सम्बन्ध सदैव प्रगाढ राख्न अग्रसर रहेको र चीन नेपालका प्रधानमन्त्रीको भ्रमण पर्खाइमा रहेको बताए ।

उपयुक्त समयमा प्रधानमन्त्रीको चीन भ्रमण हुने बताउँदै उनले दुई देशबीचको व्यापारिक सम्झौता र इन्धन आयातसम्बन्धी सम्झौतामा चाँडै उच्च तहमा सहमति हुने विश्वास व्यक्त गरे ।