काठमाडौं — व्यवसायी रामहरि श्रेष्ठको अपहरण तथा हत्या प्रकरणमा दोषी ठहर भएका नेपाल कम्युनिस्ट पार्टीका केन्द्रीय सदस्य गोविन्दबहादुर बटालाले सर्वोच्च अदालतमा उपस्थित भई आत्मसमर्पण गरेका छन्। अदालतमा हाजिर भएपछि उनलाई कैद सजाय कार्यान्वयनका लागि डिल्लीबजार कारागार पठाइएको छ।
सर्वोच्च अदालतले पुनरावलोकन सुनुवाइमार्फत यसअघि भएको फैसला उल्ट्याउँदै बटालालाई १० वर्ष कैद सजाय सुनाएको थियो। न्यायाधीशहरू डा. नहकुल सुवेदी, अब्दुल अजीज मुसलमान र शान्तिसिंह थापाको इजलासले जेठ २८ गते उक्त फैसला गरेको हो।
फैसलापछि बुधबार अदालतमा उपस्थित भएका बटालालाई सर्वोच्च अदालतको मुद्दा तथा रिट महाशाखाले कारागार चलान गरेको जनाएको छ। प्रचलित कानुनी व्यवस्थाअनुसार फैसला भएको मितिले तोकिएको अवधिभित्र स्वेच्छाले उपस्थित भई सजाय भोग्न थालेमा जरिवाना वा सजायमा आंशिक छुटको सुविधा प्राप्त हुन सक्ने व्यवस्था रहेको छ।
बटाला २०६८ सालमा व्यवसायी रामहरि श्रेष्ठको अपहरण गरी चितवनमा हत्या गरिएको घटनामा संलग्न रहेको अभियोगमा दोषी ठहर भएका हुन्। घटनाका बेला उनी तत्कालीन माओवादी लडाकु संरचनामा ब्रिगेड कमान्डरको भूमिकामा रहेको बताइन्छ।
लामो समयदेखि विभिन्न तहका अदालतमा विचाराधीन रहेको उक्त मुद्दामा सर्वोच्च अदालतको पछिल्लो फैसलासँगै बटालाविरुद्धको सजाय कार्यान्वयन प्रक्रिया औपचारिक रूपमा सुरु भएको छ।
Facebook Comments