काठमाडौं । नेकपा एमालेले हालैको निर्वाचन परिणामबारे समीक्षा गर्न देशव्यापी सुझाव संकलन अभियान चलाइरहेका बेला कोशी प्रदेशबाट पार्टी पुनर्गठन र पुस्तान्तरणको माग सशक्त रूपमा उठेको छ। विराटनगरमा मंगलबार आयोजित छलफलमा सहभागी अधिकांश नेताहरूले संगठनात्मक सुधारका लागि नेतृत्व तहमा परिवर्तन आवश्यक रहेको धारणा राखेका छन्।
निर्वाचनपछिको अवस्था, संगठनको वर्तमान स्थिति र आगामी रणनीतिबारे सुझाव लिन गठित कार्यदलको बैठकमा जिल्ला, प्रदेश र केन्द्रीय तहका नेताहरू सहभागी थिए। कार्यदलका संयोजक रामबहादुर थापा ‘बादल’ सहित महासचिव शंकर पोखरेल, उपाध्यक्षहरू विष्णु पौडेल र पृथ्वीसुब्बा गुरुङ तथा अन्य नेताहरूले प्रदेशका नेता–कार्यकर्ताको धारणा सुनेका थिए।
छलफलमा बोल्ने अधिकांश नेताहरूले पार्टीले पछिल्लो निर्वाचनमा अपेक्षाभन्दा कमजोर परिणाम व्यहोर्नुको कारण संगठनभित्रको संरचनागत कमजोरी, नेतृत्व शैलीप्रतिको असन्तुष्टि र जनतासँगको दूरी भएको विश्लेषण गरेका थिए। उनीहरूले एमालेलाई पुनः सशक्त बनाउन संगठन पुनर्गठन र नयाँ पुस्तालाई नेतृत्व हस्तान्तरण गर्नुपर्ने सुझाव दिएका छन्।
बैठकमा सहभागी केही नेताहरूले अध्यक्ष केपी शर्मा ओलीसहित पार्टीको पहिलो पुस्ताले सम्मानजनक रूपमा नेतृत्व हस्तान्तरणको प्रक्रिया सुरु गर्नुपर्ने धारणा राखे। उनीहरूको तर्क थियो कि पार्टीभित्र पुस्तान्तरण र नेतृत्व परिवर्तनको स्पष्ट सन्देश नदिएसम्म संगठनलाई नयाँ ऊर्जा दिन कठिन हुनेछ।
यद्यपि, केही नेताहरूले निर्वाचनको सम्पूर्ण जिम्मेवारी एक व्यक्तिमाथि मात्र थोपर्न नहुने बताएका छन्। झापा, पाँचथर, तेह्रथुमलगायत जिल्लाका नेताहरूले पार्टीको हारमा सामूहिक जिम्मेवारी रहेको उल्लेख गर्दै पुनर्गठनको प्रक्रिया समग्र नेतृत्व तहमा लागू हुनुपर्ने धारणा व्यक्त गरेका थिए।
उनीहरूले अध्यक्ष ओली मात्र होइन, लामो समयदेखि विभिन्न तहमा नेतृत्व सम्हाल्दै आएका अन्य नेताहरूले पनि आत्मसमीक्षा गर्दै नयाँ पुस्तालाई अवसर दिनुपर्ने आवश्यकता औँल्याए।
छलफलका क्रममा तल्लो तहका कार्यकर्ताबीच नेतृत्व शैलीप्रति असन्तुष्टि रहेको विषय पनि उठाइएको थियो। केही नेताहरूले जनतामाझ पार्टीको प्रभाव घट्नु र निर्वाचनमा अपेक्षित समर्थन नपाउनुका पछाडि आन्तरिक व्यवस्थापनका कमजोरी पनि रहेको बताएका थिए।
बैठकलाई भर्चुअल माध्यमबाट सम्बोधन गरेका अध्यक्ष ओलीले भने निर्वाचन परिणामका लागि प्रचार–प्रसारको कमजोरी र पार्टीविरुद्ध भएको नकारात्मक अभियानलाई प्रमुख कारणका रूपमा प्रस्तुत गरे। उनले पार्टीभित्र देखिएका समस्याबारे खुला छलफल गर्न आग्रह गर्दै सम्पूर्ण दोष कुनै एक व्यक्तिमाथि केन्द्रित गर्न नहुने बताए।
'निर्वाचनको समीक्षा तथ्य र अनुभवका आधारमा हुनुपर्छ। एउटा व्यक्तिलाई दोषी देखाएर समस्याको समाधान खोज्न सकिँदैन,' ओलीको भनाइ उद्धृत गर्दै सहभागी नेताहरूले बताएका छन्।
स्वास्थ्य अवस्थाका कारण प्रत्यक्ष उपस्थित हुन नसकेका ओलीले पार्टी अझै बलियो रहेको र संगठनलाई एकताबद्ध बनाएर अघि बढ्नुपर्नेमा जोड दिएका थिए।
एमालेले देशभरबाट प्राप्त सुझावका आधारमा निर्वाचन समीक्षा प्रतिवेदन तयार पार्ने तयारी गरिरहेको छ। कोशी प्रदेशबाट उठेका पुनर्गठन, पुस्तान्तरण र नेतृत्व परिवर्तनसम्बन्धी आवाजले आगामी दिनमा पार्टीभित्रको राजनीतिक बहसलाई थप तीव्र बनाउने संकेत देखिएको छ।
Facebook Comments