काठमाडौं । नेपाल कम्युनिष्ट पार्टी–एकीकृत मार्क्सवादी लेनिनवादीका उपाध्यक्ष रामबहादुर थापाले छिमेकी भारत नेपालको वर्तमान नेतृत्वप्रति सन्तुष्ट नरहेको दाबी गरेका छन्। उनले राजनीतिक सन्तुलन जोगाउने प्रयासस्वरूप सीमा विवादको विषयमा बेलायतको प्रसङ्ग उठाइएको टिप्पणी पनि गरे।
शुक्रबार काठमाडौंमा आयोजित एमाले बागमती प्रदेश संगठन कमिटीको बैठकलाई सम्बोधन गर्दै उपाध्यक्ष थापाले प्रधानमन्त्री वालेन्द्र शाहले सत्ता टिकाउने रणनीतिअन्तर्गत सीमा विवाद समाधानका नाममा बेलायतको संलग्नताको कुरा अघि सारेको जिकिर गरे। उनका अनुसार यस्तो अभिव्यक्तिले कूटनीतिक सन्देश दिने प्रयत्न देखिन्छ।
थापाले राष्ट्रिय स्वतन्त्र पार्टीका सभापति रवि लामिछानेको हालैको भारत भ्रमण र त्यहाँ भएको स्वागतलाई अर्थपूर्ण रूपमा लिनुपर्ने बताए। 'वर्तमान नेतृत्वप्रति असन्तुष्टि देखिएको सन्दर्भमा भारतले वैकल्पिक नेतृत्वको खोजी गरेको संकेत देखिन्छ,' उनले भने।
एमाले संसदीय दलका नेतासमेत रहेका थापाले २०८२ भदौ २३ र २४ गते भएको ‘जेन–जी आन्दोलन’ लाई क्रान्ति नभई प्रतिगमनको रूपमा चित्रित गरे। उनका अनुसार उक्त घटनाक्रमले राजनीतिक अस्थिरता बढाएको थियो।
उनले वर्तमान सरकार स्थापना भएयता स्वेच्छाचारिता र अधिनायकवादी प्रवृत्ति देखिएको आरोप लगाए। साथै, जनतामा भ्रम सिर्जना गरेर राष्ट्रिय स्वतन्त्र पार्टीले सफलता हासिल गरेको दाबी गर्दै त्यो अवस्था धेरै समय नटिक्ने टिप्पणी गरे।
उपाध्यक्ष थापाले पार्टीभित्र देखिएका कमजोरी सच्याउँदै संगठन सुदृढीकरणमा लाग्नुपर्ने आवश्यकता औँल्याए। 'आन्तरिक एकता, स्पष्ट राजनीतिक दिशा र जनतासँगको सम्बन्ध बलियो बनाएर आगामी दिनमा विजय हासिल गर्न सकिन्छ,' उनले कार्यकर्तालाई निर्देशन दिए।
Facebook Comments