काठमाडौं — राष्ट्रिय प्रजातन्त्र पार्टी (राप्रपा)मा नेतृत्व विवाद फेरि तातो बनेको छ। पार्टी अध्यक्ष राजेन्द्र लिङदेनमाथि असफल नेतृत्वको आरोपसहित मार्गप्रशस्त गर्न दबाब बढ्दै गएको छ।
पार्टीको संसदीय दलका नेता तथा एक मात्र प्रत्यक्ष निर्वाचित सांसद ज्ञानेन्द्र शाहीले अध्यक्षलाई महाधिवेशनअघि राजीनामा दिन सुझाव दिएका छन्।
शाहीले फेसबुकमा सक्रिय स्टाटस पोस्ट गर्दै पार्टीलाई विभाजनको मार्गमा धकेलेको आरोप दुवै पक्षमाथि लगाएका छन्। नेपाल प्रेससँगको संवादमा उनले भने, “अध्यक्षले राजीनामा दिएर महाधिवेशन आयोजना गर्ने बाटो खुलाउनु पर्छ। आफू उम्मेदवार बन्ने हो भने आयोजक समितिको संयोजक हुनु उचित हुँदैन।”
उनले पार्टीमा पुस्तान्तरण अपरिहार्य रहेको र वर्तमान नेतृत्व फेल भइसकेको स्पष्ट पारे। शाहीका अनुसार, “राजेन्द्र लिङदेनको नेतृत्वमा पार्टी अब बलियो हुँदैन। चुनावमा हार र काम गर्ने क्षमताको अभावले नेतृत्व फेल भएको छ। अब युवाको नेतृत्वमा पार्टी र देश दुवै अघि बढ्नुपर्छ।”
राप्रपा फुट्ने कुरा नरहेको भन्दै शाहीले भनाए, “केही साथीहरू गए पनि पार्टी फुटेको होइन। मिलेर समस्या समाधान गर्न सकिन्छ।” उनले महाधिवेशनमा आफू अध्यक्षको उम्मेदवार नहुने तर पार्टी अध्यक्षसँग सल्लाह गरेर नेतृत्व हस्तान्तरण सुनिश्चित गर्न चाहेको बताए।
शाहीको दृष्टिमा अबको महाधिवेशनले केवल पार्टी बलियो बनाउने मात्र होइन, जनताको विश्वास पनि जित्ने नेतृत्व चयन गर्नुपर्ने महत्वपूर्ण अवसर हो।
Facebook Comments