काठमाडौं । प्रतिनिधिसभामा लगातार विरोध प्रदर्शन गरिरहेका श्रम संस्कृति पार्टीका सांसद हर्क साम्पाङलाई सभामुख डीपी अर्यालले चेतावनी दिएका छन्। साम्पाङले प्रधानमन्त्री बालेन शाह र मन्त्रीहरू जवाफदेही नभएको भन्दै पटक–पटक बैठक अवरोध गर्दै आएका छन्।
सभामुख अर्यालले हर्कलाई प्रतिनिधिसभा नियमावलीको नियम ३० अनुसार आफ्नो व्यवहार नियन्त्रण गर्न सचेत गराएका छन्। नियम ३० र ३१ अनुसार, बैठकमा अभद्र व्यवहार गर्ने सदस्यलाई सभामुखले चेतावनी दिन सक्ने र चेतावनी पालन नगरे बैठकबाट बाहिर निकाल्ने, तीन दिनसम्म निलम्बन गर्ने व्यवस्था छ।
तर हर्क साम्पाङले चेतावनीको बावजुद विरोध जारी राख्ने अडान लिएका छन्। उनले संसद भवन परिसरमा सञ्चारकर्मीहरूसँग भने, “सरकार जिम्मेवार नभएसम्म हाम्रो विरोध पाँच वर्षसम्म चल्नेछ। निलम्बन भए पनि जनताको लागि तयार छौँ।”
आजको बैठकमा साम्पाङसहित अन्य सांसदहरूले पर्चा देखाएर प्रश्नोत्तर अवरुद्ध गरे। सभामुखले मन्त्रीहरूको जवाफ सुन्न दिने तर नियमअनुसार मात्र बोल्न आग्रह गरे। हर्कले भने, आफूहरूले अभद्र व्यवहार नगरेको दाबी गरे र नियमावलीको पालनामा प्रश्न उठाए।
प्रतिनिधिसभा नियमावलीअनुसार, सदस्यले लगातार अव्यवस्था, अभद्र व्यवहार वा सभामुखको आदेश अवहेलना गरे निलम्बन वा निष्कासन हुने व्यवस्था छ। नियम ३२ र ३३ अनुसार, निलम्बन गरिएको सदस्य पन्ध्र दिनसम्म बैठकमा सहभागी हुन पाउँदैन र ध्वंसात्मक कार्यमा भौतिक क्षतिपूर्ति गर्नुपर्ने हुन सक्छ।
नियमावली ३४ अनुसार, सदस्यले माफी मागे वा आफ्नो भूल स्वीकार गरेमा सभामुखले कारबाही फिर्ता लिन सक्ने व्यवस्था पनि छ। यसरी हर्क साम्पाङको निरन्तर विरोधपछि सभामुखले नियमको आधारमा कारबाहीको संकेत दिएका हुन्।
Facebook Comments