इस्लामाबाद । मध्यपूर्वमा बढ्दो तनाव न्यूनीकरण गर्ने प्रयासस्वरूप इरान र अमेरिकाबीच प्रस्तावित दोस्रो चरणको शान्ति वार्ताका लागि इरानी उच्चस्तरीय टोली पाकिस्तान पुगेको छ। इरानका विदेशमन्त्री अब्बास अराघची शुक्रबार राति इस्लामाबाद आइपुगेका हुन्।
उनसँगै विदेश मन्त्रालयका प्रवक्ता इस्माइल बाघाई सहितको प्रतिनिधिमण्डल पनि पाकिस्तान पुगेको छ। भ्रमणका क्रममा अराघचीले पाकिस्तानी प्रधानमन्त्री शहबाज शरीफ तथा सेना प्रमुख असीम मुनिर सँग छुट्टाछुट्टै भेटवार्ता गर्ने कार्यक्रम तय भएको छ।
यसैबीच अमेरिकी पक्षबाट विशेष दूत स्टिभ विटकोफ र पूर्व राष्ट्रपति डोनाल्ड ट्रम्प का ज्वाइँ जारेड कुश्नर पनि शनिबार पाकिस्तान पुग्ने तयारीमा रहेका छन्। ह्वाइट हाउसकी प्रेस सेक्रेटरी क्यारोलिन लेविट ले उनीहरू इरानी प्रतिनिधिमण्डलसँग प्रत्यक्ष वार्तामा सहभागी हुने पुष्टि गरेकी छन्।
पाकिस्तानले यस प्रक्रियामा मध्यस्थकर्ताको भूमिका निर्वाह गरिरहेको छ। पाकिस्तानी विदेश कार्यालयका अनुसार इरानी टोलीलाई उपप्रधानमन्त्री इशाक डार लगायत उच्च अधिकारीहरूले स्वागत गरेका थिए।
इरानी दूतावासले सार्वजनिक गरेको वक्तव्यमा यस भ्रमणले द्विपक्षीय सम्बन्ध सुदृढ गर्नुका साथै क्षेत्रीय परिस्थितिबारे गहन छलफल गर्ने उद्देश्य राखेको उल्लेख छ। स्रोतहरूका अनुसार प्रारम्भिक छलफलपछि इस्लामाबादमै अमेरिका–इरानबीच दोस्रो चरणको औपचारिक वार्ता हुने अपेक्षा गरिएको छ।
यदि प्रारम्भिक समझदारी जुटेमा अमेरिकी प्रतिनिधिमण्डल शनिबार रातिसम्म इस्लामाबाद आइपुग्ने सम्भावना रहेको बताइएको छ।
Facebook Comments