काठमाडौं । संसदीय समितिहरूको नेतृत्व चयनसँगै सत्तारूढ दलको प्रभाव र विपक्षी दलहरूको सहकार्य दुवै एकैपटक देखिएको छ। प्रतिनिधिसभामा बलियो बहुमत रहेको राष्ट्रिय स्वतन्त्र पार्टी (रास्वपा) ले सार्वजनिक लेखा समिति बाहेक अधिकांश समितिमा आफ्नो एकलाैटी कायम गरेको छ।
निर्वाचन परिणामअनुसार १२ मध्ये ११ समितिको सभापति रास्वपाका सांसदहरू बनेका छन्। राज्य व्यवस्था तथा सुशासन समितिमा हरि ढकाल, कृषि तथा प्राकृतिक स्रोत समितिमा अशोककुमार चौधरी, महिला तथा सामाजिक मामिला समितिमा आकृति अवस्थी र उद्योग, वाणिज्य तथा श्रम समितिमा रहबर अन्सारी चयन भएका छन्।
त्यसैगरी शिक्षा, स्वास्थ्य तथा सूचना प्रविधि समितिमा ओजस्वी शेरचन, अन्तर्राष्ट्रिय सम्बन्ध तथा पर्यटन समितिमा सुम्निमा उदास, अर्थ समितिमा कृष्णहरि बुढाथोकी, संसदीय सुनुवाइ समितिमा बोधनारायण श्रेष्ठ र राज्यका निर्देशक सिद्धान्तसम्बन्धी समितिमा गणेश कार्की सभापति बनेका छन्।
सार्वजनिक लेखा समितिको नेतृत्व भने नेपाली कांग्रेस का भरतबहादुर खड्का ले सम्हालेका छन्, जसमा रास्वपाको समेत समर्थन रहेको थियो। विपक्षी दलहरूले उम्मेदवारी नदिएका कारण अधिकांश समितिमा सभापतिहरू निर्विरोध चयन भएका हुन्।
यद्यपि, केही समितिमा प्रतिस्पर्धा पनि देखिएको थियो। शिक्षा समितिमा नेकपा एमाले का उम्मेदवारलाई कांग्रेस र अन्य दलहरूको समर्थन रहेको थियो भने राज्यका निर्देशक सिद्धान्तसम्बन्धी समितिमा पनि मतदानमार्फत निर्णय गर्नुपरेको थियो।
समिति सभापति चयन प्रक्रियामा रास्वपाले अन्य दलसँग सहकार्य नगरेको भन्दै विपक्षीहरू एकजुट भएका छन्। नेपाली कांग्रेस, नेकपा एमाले लगायतका दलहरूले संयुक्त रणनीति बनाउँदै केही समितिमा साझा उम्मेदवारी दिएका थिए।
विपक्षी सांसदहरूले बहुमतको आडमा सबै पदमा एकल नियन्त्रण स्थापित गर्ने प्रयासले संसदीय अभ्यास कमजोर हुन सक्ने चेतावनी दिएका छन्। उनीहरूले संसदीय समितिहरूलाई ‘मिनी संसद्’का रूपमा व्याख्या गर्दै शक्ति सन्तुलन कायम गरिनुपर्नेमा जोड दिएका छन्।
यसैबीच, सभापति चयन प्रक्रियाका क्रममा सभामुख डोलप्रसाद अर्याल ले समिति सदस्यहरू हेरफेर गरेको विषयमा पनि विवाद उत्पन्न भएको छ। विपक्षी दलहरूले प्रक्रिया मिचिएको आरोप लगाउँदै आपत्ति जनाएका छन्।
समग्रमा, समितिको नेतृत्व चयनले सत्तापक्षको बलियो पकड देखाए पनि विपक्षी दलहरूबीच बढ्दो सहकार्यले आगामी संसदीय गतिविधिमा नयाँ राजनीतिक समीकरणको संकेत दिएको छ।
Facebook Comments