काठमाडौं । प्रतिनिधिसभा अन्तर्गतका विषयगत समितिहरूको नेतृत्व चयनका लागि निर्वाचन मिति तय भएसँगै राजनीतिक दलहरूबीच आन्तरिक छलफल तीव्र बनेको छ।
सभामुख डोलप्रसाद अर्याल ले प्रतिनिधिसभा नियमावली २०७९ अनुसार वैशाख ४ गते दिउँसो १ बजे समिति सभापति चयनका लागि निर्वाचन हुने घोषणा गरेका हुन्। उक्त निर्वाचनबाट प्रतिनिधिसभाका सबै विषयगत समितिहरूको नेतृत्व टुंगो लाग्नेछ।
प्रतिनिधिसभामा हाल १० वटा विषयगत समिति सक्रिय छन्, जसमा अर्थ, अन्तर्राष्ट्रिय सम्बन्ध तथा पर्यटन, उद्योग–वाणिज्य तथा श्रम, कानून–न्याय, कृषि, पूर्वाधार, महिला तथा सामाजिक मामिला, राज्य व्यवस्था, शिक्षा–स्वास्थ्य तथा सूचना प्रविधि र सार्वजनिक लेखा समिति रहेका छन्। साथै दुई संयुक्त समितिहरू पनि क्रियाशील छन्।
संसदीय अंकगणितका आधारमा राष्ट्रिय स्वतन्त्र पार्टी (रास्वपा) स्पष्ट बहुमतसहित अग्रस्थानमा छ। त्यसपछि नेपाली कांग्रेस, नेकपा एमाले लगायतका दलहरूको उपस्थिति रहेको छ। यस्तो अवस्थामा अधिकांश समिति सभापति रास्वपाले नै लिने हो वा अन्य दललाई पनि अवसर दिने हो भन्ने चासो बढेको छ।
विशेषगरी सार्वजनिक लेखा समितिको नेतृत्वलाई लिएर बहस चर्किएको छ। परम्परागत रूपमा उक्त समितिको सभापति प्रमुख प्रतिपक्षी दललाई दिने अभ्यास रहँदै आएको छ, जसले सरकारमाथि प्रभावकारी निगरानी कायम राख्ने उद्देश्य राख्छ। यस आधारमा नेपाली कांग्रेस स्वाभाविक दाबेदार मानिए पनि श्रम संस्कृति पार्टी ले पनि लेखा समिति सभापतिमा दाबी प्रस्तुत गरेको छ।
यस विषयमा अन्तिम निर्णय भने रास्वपाकै हातमा रहने देखिन्छ। रास्वपाका नेताहरूले भने समितिको नेतृत्वबारे छलफल जारी रहेको र सबै पक्षलाई समेट्ने ढंगले निर्णय लिन सकिने संकेत दिएका छन्।
समिति नेतृत्व चयनलाई ‘मिनी संसद्’ को शक्ति सन्तुलनसँग जोडेर हेरिने भएकाले आगामी निर्वाचनले संसदीय अभ्यासको स्वरूप कस्तो हुने भन्नेमा महत्त्वपूर्ण संकेत दिने अपेक्षा गरिएको छ।
Facebook Comments