काठमाडौं । प्रतिनिधिसभामा प्रतिनिधित्व गर्ने राजनीतिक दलहरूबीच संसद्को पहिलो बैठकमै सभामुखको निर्वाचनसम्बन्धी प्रस्ताव प्रस्तुत गर्ने सहमति जुटेको छ ।
सभाका ज्येष्ठ सदस्य अर्जुननरसिंह केसीको अध्यक्षतामा बुधबार सिंहदरबारमा बसेको दलका प्रतिनिधिको बैठकमा उक्त सहमति जुटेको राष्ट्रिय स्वतन्त्र पार्टीका महामन्त्री कविन्द्र बुर्लाकोटीले जानकारी दिए ।
'सभामुखको निर्वाचनसम्बन्धी प्रस्ताव पहिलो बैठकमा प्रस्तुत हुने र चैत २० गते मनोनयन र २२ गते निर्वाचन गर्ने सहमति जुटेको छ,' उनले भने ।
दलहरूबीच संसद्को पहिलो बैठकमा जेनजीसहित सबै आन्दोलनका सहिदप्रति श्रद्धाञ्जलि व्यक्त गर्ने तथा दलका शीर्ष नेताहरूले शुभकामना सम्बोधन गर्ने सहमति भएको छ ।
बैठकले मौजुदा प्रतिनिधिसभा नियमावली प्रतिस्थापन नहुँदासम्मका लागि पुरानै नियमावलीबाट प्रतिनिधिसभा बैठक सञ्चालन गर्ने र छिट्टै नयाँ नियमावली मस्यौदा गरेर जाने निर्णय गरेको छ ।
कार्यव्यवस्था समिति र अध्यक्षता गर्ने सदस्यको चयन गर्नेबारेमा पनि छलफल भएको महामन्त्री बुर्लाकोटीले जानकारी दिए । उनका अनुसार कार्यव्यवस्था समितिको सङ्ख्याका बारेमा थप सरसल्लाह हुनेछ ।
बैठकमा कानुन, न्याय तथा संसदीय मामिलामन्त्री सोविता गौतम, सङ्घीय संसद् सचिवालयका महासचिव पद्मप्रसाद पाण्डेयसहित राष्ट्रिय स्वतन्त्र पार्टी, नेपाली कांग्रेस, नेपाल कम्युनिष्ट पार्टी (एमाले), नेपाली कम्युनिष्ट पार्टी र राष्ट्रिय प्रजातन्त्र पार्टीका नेता सहभागी थिए ।
प्रतिनिधिसभाको गत फागुन २१ गते सम्पन्न निर्वाचनपश्चात् बिहीबारदेखि संसद्को नयाँ अधिवेशन प्रारम्भ हुँदै छ ।
Facebook Comments