काठमाडौँ । प्रतिनिधिसभामा बिहीबार शपथ लिने सांसदहरूको सूची हेर्दा यसपटक संसद् नयाँ अनुहारले भरिएको देखिएको छ। गत फागुन २१ गते सम्पन्न प्रतिनिधिसभा निर्वाचनबाट निर्वाचित सदस्यहरूमध्ये बहुसंख्यक पहिलोपटक सदनमा प्रवेश गरेका हुन् भने थोरै संख्यामा मात्र पुराना सांसदहरू पुनः निर्वाचित भएका छन्।
नयाँ राजनीतिक शक्तिको उदय र मतदाताको परिवर्तन चाहनाले यसपटकको संसद् संरचनामा स्पष्ट प्रभाव पारेको देखिन्छ। विशेषगरी राष्ट्रिय स्वतन्त्र पार्टी (रास्वपा) को वर्चस्वले पुराना अनुहारलाई विस्थापित गर्दै नयाँ पुस्ताको प्रवेशलाई बलियो बनाएको छ।
रास्वपामा सीमित दोहोरिने सांसद
निर्वाचनमा १८२ सिट जितेको रास्वपामा १४ जना मात्रै दोहोरिएका सांसद छन्। पार्टी सभापति रवि लामिछाने, उपसभापतिद्वय डोलप्रसाद अर्याल र स्वर्णिम वाग्ले यसअघि पनि संसद् अनुभव भएका नेताहरू हुन्।
यसैगरी इन्दिरा राना मगर, अमरेशकुमार सिंह, सोविता गौतम, शिशिर खनाल, गणेश पराजुली, हरि ढकाल, अशोककुमार चौधरी, विराजभक्त श्रेष्ठ, निशा डाँगी, मनिष झा र तोसिमा कार्की समेत पुनः निर्वाचित भएका छन्। यी सबै प्रत्यक्ष निर्वाचन प्रणालीमार्फत विजयी भएका हुन्।
कांग्रेसमा पनि नयाँ अनुहारको वर्चस्व
नेपाली कांग्रेस बाट निर्वाचित ३८ सांसदमध्ये केवल आठजना मात्रै दोहोरिएका छन्। अर्जुननरसिंह केसी, भीष्मराज आङ्देम्बे, मोहन आचार्य, भरतबहादुर खड्का, जनक गिरी, चन्द्रमोहन यादव, टेकबहादुर गुरुङ, योगेश गौचन थकाली र अभिषेकप्रताप साह यसअघि पनि सांसद भइसकेका अनुहार हुन्।
यसले कांग्रेसभित्र पनि नयाँ पुस्ताको प्रवेश उल्लेख्य रहेको संकेत गर्छ।
एमाले र नेकपामा सीमित पुनरावृत्ति
नेकपा एमाले का २५ सांसदमध्ये सात जना मात्रै दोहोरिएका छन्। रामबहादुर थापा, पद्मा अर्याल, यज्ञबहादुर बोगटी, गणेशसिंह ठगुन्ना, मोहम्मद इस्तियाक राई, लक्ष्मीप्रसाद पोखरेल र सुहाङ नेम्वाङ पुनः संसद्मा प्रवेश गरेका छन्।
त्यस्तै नेपाल कम्युनिष्ट पार्टी का १७ निर्वाचितमध्ये पुष्पकमल दाहाल, मातृकाप्रसाद यादव, वर्षमान पुन, धनबहादुर बुढा र महेन्द्रबहादुर शाही पुनः निर्वाचित भएका छन्।
राप्रपामा एक मात्रै दोहोरिए
राष्ट्रिय प्रजातन्त्र पार्टी (राप्रपा) बाट निर्वाचित पाँच सांसदमध्ये ज्ञानेन्द्रबहादुर शाही मात्रै दोहोरिएका छन्। उनी यस दलबाट प्रत्यक्ष निर्वाचित एकमात्र सांसदसमेत हुन्।
शीर्ष नेतृत्वको अनुपस्थिति
यसपटकको निर्वाचनमा केही ठूला दलका शीर्ष नेतृत्व नै संसद्बाहिर रहेका छन्। रास्वपा, एमाले र केही नयाँ शक्तिबाहेक अन्य दलका प्रभावशाली शीर्ष नेताहरू सदनमा अनुपस्थित रहनुले संसद्को शक्ति सन्तुलनमा नयाँ समीकरण देखिएको छ।
नयाँ संसद्, नयाँ चुनौती
समग्रमा हेर्दा यसपटकको प्रतिनिधिसभा ‘नयाँ अनुहारहरूको संसद्’ बनेको छ। अनुभव र नयाँ ऊर्जाबीच सन्तुलन कायम गर्दै नीति निर्माणमा प्रभावकारी भूमिका खेल्ने चुनौती अब नवनिर्वाचित सांसदहरूको काँधमा आएको छ।
Facebook Comments