काठमाडौं । नव निर्वाचित प्रतिनिधिसभा सदस्य तथा श्रम संस्कृति पार्टीका अध्यक्ष हर्क साम्पाङ ले आफ्नो दल सरकारमा नजाने निर्णय सार्वजनिक गरेका छन्। राजधानीमा सञ्चारकर्मीसँग कुरा गर्दै उनले जनताले आफूहरूलाई सत्ताभन्दा पनि प्रतिपक्षको भूमिकामा देख्न चाहेको भन्दै सोही अनुसार अघि बढ्ने बताएका हुन्।
साम्पाङले जनमतलाई नै राजनीतिक मार्गनिर्देशक ठानेर पार्टीले प्रतिपक्षमा रहेर सरकारलाई निगरानी गर्ने र जनताका मुद्दा उठाउने बताए। “हामीलाई प्रश्न गर्ने जिम्मेवारी दिइएको छ, त्यसलाई इमान्दारीपूर्वक पूरा गर्छौँ,” उनले भने।
सरकारमा सहभागी हुने सम्भावनाबारे सोधिएको प्रश्नमा उनले स्पष्ट रूपमा कुनै पनि प्रस्ताव स्वीकार नगर्ने संकेत दिए। तर, राष्ट्रहितमा गरिने सकारात्मक निर्णयमा भने रचनात्मक समर्थन रहने उनको भनाइ थियो। “राम्रो कामलाई साथ दिन्छौँ, तर गलत निर्णयको विरोध गर्न पछि हट्दैनौँ,” उनले जोड दिए।
प्रधानमन्त्री चयनबारे धारणा राख्दै उनले प्रतिपक्षका प्रश्नको सामना गर्न सक्ने सक्षम नेतृत्व आवश्यक रहेको उल्लेख गरे। यसक्रममा उनले पुनः रवि लामिछाने लाई प्रधानमन्त्रीका लागि उपयुक्त व्यक्ति भएको आफ्नो अडान दोहोर्याए।
चुनावअघि आफूले प्रधानमन्त्री बन्ने आकांक्षा व्यक्त गरेको प्रसंगमा उनले त्यो सामान्य राजनीतिक अभिव्यक्ति भएको स्पष्ट पारे। “नेताले आकांक्षा राख्नु स्वाभाविक हो, तर अन्तिम निर्णय जनताकै हुन्छ,” उनले भने, “जनताले त्यो जिम्मेवारी नदिएकाले मेरो दाबी मात्रले केही हुँदैन।”
उनले आफू जनताभन्दा माथि नभएको दोहोर्याउँदै आफ्नो पार्टीलाई अपेक्षित मत किन नआयो भन्ने प्रश्नको जवाफ पनि जनतासँगै खोज्नुपर्ने बताए। अन्त्यमा उनले आफ्नो राजनीतिक बाटो स्पष्ट भएको उल्लेख गरे—अबको भूमिका प्रतिपक्षमा बसेर जनताका सरोकारलाई सशक्त रूपमा उठाउने।
Facebook Comments