आज भक्तपुर जाऔँ

काठमाडौं । फागुन २१ को निर्वाचन नजिकिँदै गर्दा नेपाली कांग्रेसले देशभरि सक्रिय प्रचार प्रसार र चुनावीसभामा जुटेको छ । आज आइतबार पार्टीका उपसभापति विश्वप्रकाश शर्मा भक्तपुरमा हुने चुनावी सभालाई सम्बोधन गर्न जाने भएका छन् । भक्तपुर १ मा कांग्रेसबाट किरण न्यौपाने र कबिर राणा उम्मेदवार रहेका छन् । राणा पुराना राजनीतिज्ञ, पत्रकार र वकिल हुन् भने न्यौपाने पनि राजनीतिका साथै वकालतमा संलग्न छन् ।

यसअघि पार्टी सभापति गगनकुमार थापाले देशव्यापी चुनावी सभामा सहभागी हुँदै देशभर कांग्रेसको लहर बढाएका छन् । शनिबार मात्रै उनले मधेसका चार जिल्लामा—सर्लाही, रौतहट, बारा र पर्सामा—सभालाई सम्बोधन गरे । सर्लाहीको लालबन्दी, रौतहट, बारासम्म पुगेर पर्साको वीरगन्जमा उनले पार्टीका एजेन्डा र प्रतिज्ञा जनतासम्म पु¥याए ।

उपसभापति विश्वप्रकाश शर्माले पनि देशभर सक्रिय अभियान चलाइरहेका छन् । बिहीबार, डोल्पा, र सुर्खेतका कार्यक्रममा सहभागी भएका उनले शुक्रबार पोखरा, बुटवल, नवलपरासी, बागलुङ र कपिलवस्तुका चुनावी सभामा सम्बोधन गरे । शनिबार गुल्मीमा आयोजित सभामा उनले कांग्रेस निर्वाचित भएपछि विकास, शिक्षा, स्वास्थ्य र पूर्वाधार सुधारमा जोड दिने प्रतिबद्धता व्यक्त गरे ।

शर्माले मधेशमा पनि जनसम्पर्क अभियान चलाएका छन् । राजविराजमा गजेन्द्रनारायण सिंहको सालिकमा माला र अबिर लगाएर सम्मान प्रकट गर्दै उनले यसले कांग्रेसको आस्था र सामाजिक उत्तरदायित्व देखाउने बताए । उनले रास्वपा नेता बालेन्द्र साहको पहिले गरिएको अपमानलाई पनि स्मरण गर्दै कांग्रेसले सहिष्णुता र सम्मान कायम राख्ने दाबी गरे । बालेन्द्रले आफ्ना समर्थकले दिएको माला अस्वीकार गर्दै गजेन्द्रनारायाणको सालिकमा गाडीबाटै फ्याँकेका थिए ।

कांग्रेसका शीर्ष नेताहरू—सभापति गगन थापा, उपसभापति शर्मा र पुष्पा भुसाल—देशका विभिन्न निर्वाचन क्षेत्र पुगेर मतदाता भेटघाट, घरदैलो र सभामा सक्रिय छन् । सभापति थापाले पोखरा, बुटवल, सुर्खेत, बागलुङ र कास्कीमा आयोजित सभामा कांग्रेसको कार्यक्रम र योजनालाई विस्तारपूर्वक प्रस्तुत गर्दै जनताको समर्थन आह्वान गरेका छन् ।

नेपाली कांग्रेसले पाँच वर्षको कार्यकालमा देशलाई सुशासन र विकासको मार्गमा अघि बढाउने लक्ष्य प्रस्तुत गरेको छ । सभापति थापाले निर्वाचनपछि मात्र होइन, मतदानअघि नै पार्टीका उम्मेदवार र कार्यकर्ताहरूलाई जनता माझ पुगेर विश्वास जित्न निर्देशन दिएका छन् । उनका अनुसार, ‘देशलाई व्यवस्थित रूपमा अगाडि बढाउन योग्य नेतृत्व आवश्यक छ, र त्यो शक्ति अहिले कांग्रेसमा मात्र छ ।’

उपसभापति शर्माले पनि मतदातालाई सभापति थापा र कांग्रेसको योजनाबारे जानकारी दिँदै पार्टीमा विश्वास गर्न आग्रह गरेका छन् ।

भक्तपुरमा आइतबार हुने चुनावी सभाले काठमाडौं उपत्यकामा कांग्रेसको जनसम्पर्क र प्रचार अभियानलाई थप सशक्त बनाउने अनुमान गरिएको छ । पार्टीका नेताहरू यस अवसरमा मतदातालाई आफ्नो एजेन्डा बुझाउँदै कांग्रेसको पक्षमा माहोल बनाउन सक्रिय छन् ।

यस अभियानले देशव्यापी स्तरमा कांग्रेसको लोकप्रियता र संगठनात्मक शक्ति मजबुत बनाउने विश्वास नेताहरू राखेका छन् । निर्वाचनको अन्तिम चरणमा पार्टीका शीर्ष नेताहरूको सक्रियता र चुनावी रणनीति मतदातामाझ प्रभाव पार्ने मुख्य तत्वका रूपमा देखिन्छ ।