रुकुम । फागुन २१ गते हुने प्रतिनिधि सभा सदस्य निर्वाचनमा नेपाली कांग्रेसले रुकुम पश्चिममा युवा नेता राजु केसीलाई उम्मेदवार बनाएपछि कांग्रेस घरदैलोमा व्यस्त रहेको छ ।
सफल युवा व्यवसायी र युवा पुस्ताको प्रतिनिधित्व गर्ने नेता मैदानमा उत्रिएपछि मत परिणाम आफ्नै पोल्टामा पार्न कांग्रेसले जनभेटघाट तथा अन्तरक्रिया कार्यक्रमलाई तीव्रता दिइरहेको छ ।
उम्मेदवार केसीसहितको प्रचार अभियान टोली बाँफिकोट सानिभेरीका बस्तीहरुमा भेटघाट सकेर चौरजहारीमा दैनिक गतिविधि गरिरहेको छ । पार्टीको पालिकास्तरिय समितिले पनि जिल्लाका विभिन्न स्थानमा घरदैलो गरिरहेका छन् ।
यस पटकको निर्वाचनमा तत्कालीन माओवादी फुटको लाभ लिएर जित हासिल गर्ने दाउमा रहेको रुकुम कांग्रेसले यो मौका नगुमाउन कसरत शुरू गरेको छ । भदौ २३ र २४ को जेन-जी आन्दोलनपछि परिवर्तित समयको माग र सुशासनको पक्षमा काम गर्ने प्रतिबद्धतासहित घरदैलोमा कार्यकर्ता भेटघार गरिरहेको उम्मेदवार केसीले बताएका छन् ।
उनले कांग्रेसका आस्थावान् जेष्ठ नागरिकहरुले दिने माया र आशीर्वाद तथा युवा पुस्ताले दिइरहेको साथले आफूलाई जितको लागि सहज भइरहेको बताए । ३० वर्षदेखि रुकुम पश्चिममा सत्ता बिमुख भएका कांग्रेसजनले पाएको पीडा र भोगेको अन्याय चिर्नलाई कांग्रेसले जित निकाल्ने उनको भनाइ छ ।
जिल्लामा विकास प्रक्रियामा भएको एकलौटीपन, दलीय दम्भ र अन्यायमा परेका आम नागरिकले आफ्नो उम्मेदवारीलाई विकास, समृद्धि, न्याय र समानताको रुपमा लिएको उम्मेदवार केसीको भनाइ छ ।
केसीले भने, “आत्मनिर्भर रुकुम र विवेकी रुकुमेली बनाउन म राजनीतिको मैदानमा आएको छु, आर्थिक उत्पादनका गतिविधिहरुमार्फत गाउँमै स्वरोजगार बन्ने अवस्था निर्माणका लागि प्रतिबद्ध छु ।” उनले गाउँमा देखिएको उत्साहले आफूलाई थप हौसला बढिरहेको बताए ।
परिवर्तित परिस्थितिअनुसार पुस्तान्तरणको मागलाई आत्मसाथ गरेर उम्मेदवार चयन गरेको कांग्रेसको देशव्यापी लहरमा रुकुम पनि सामेल भएको उहाँको बुझाई छ । रुकुमका कांग्रेसजनहरुले आफ्नै चुनावी चिन्हमा मतदान गर्ने मौका समेत भएकोले एकढिक्का कांग्रेसकै कारण आफू ढुक्कले जित्ने केसीको भनाइ छ ।
Facebook Comments