काठमाडौं। नेपाली कांग्रेसबाहेक १५ राजनीतिक दलले निर्वाचन आयोगमा समानुपातिक निर्वाचन प्रणालीतर्फको उमेदवारको बन्दसूची बुझाएका छन्। अहिलेसम्म समानुपातिक बन्दसूचीमा दर्ताका लागि ५५ दलले धरौटी बुझाइसकेका छन्।
नेपाली कांग्रेसलाई भने समानुपातिकको बन्द सूची तयार गर्न सकस परेको छ । निर्वाचन आयोगमा सूची बुझाउने समय सकिनै लाग्दा पनि कांग्रेसले बन्द सूची पेस गरेको छैन । कांग्रेसले सूची बुझाउनका लागि धरौटी बुझाएको चार घण्टा भइसकेको छ ।
कांग्रेसमा संस्थापनले ६० र इतरले ४० प्रतिशत भाग दिनुपर्ने संस्थापनको अडानपछि मिलेको प्रदेश तहको बन्द सूचीमा कुरा मिल्न सकेको छैन ।
आयोग प्रवक्ता नारायणप्रसाद भट्टराईका अनुसार नेमकिपा, नेपाल लोकतान्त्रिक पार्टी, राष्ट्रिय जनमोर्चा, जनप्रिय लोकतान्त्रिक पार्टी, नेपाल कम्युनिस्ट पार्टी मार्क्सवादी (पुष्पलाल), गतिशील लोकतान्त्रिक पार्टी, जसपा नेपाल, समावेशी समाजवादी पार्टी, समावेशी समाजवादी पार्टी नेपालले सूची बुझाएका छन्।
यस्तै, नेपाल जनता संरक्षण पार्टी, नागरिक शक्ति नेपाल, राष्ट्रिय जनमुक्ति पार्टी, मंगोल नेसनल अर्गनाइजेसन र उन्नत लोकतन्त्र पार्टीले पनि बन्दसूची बुझाएको छ।
२१ फागुनका लागि तय गरिएको समानुपातिकतर्फको बन्दसूची बुझाउने आज (सोमबार) राति १२ बजेसम्म अन्तिम दिन हो। १२ बजेभित्र आयोग प्रवेश गरिसकेकाहरुले बन्दसूची बुझाउन सक्ने आयोगले जनाएको छ।
Facebook Comments