काठमाडौँ । नेपाली कांग्रेसको महाधिवेशन तालिका ल्याउने विषयमा संस्थापन पक्ष लचिलो बनेको देखिएको छ। लामो समयदेखि मंसिरमा महाधिवेशन गर्नुपर्ने वा नहुने भन्ने विवादबीच बुधबार ललितपुरको धोबीघाटमा बसेको संस्थापन पक्षको भेलाले मध्यमार्गी सहमतिको संकेत गरेको हो।
भेलामा सहभागी नेताहरूका अनुसार संस्थापन पक्षले अब मंसिरभित्रै क्रियाशील सदस्यता टुंग्याउने र तल्लो तहका अधिवेशनको तालिका ल्याउने तयारी गरेको छ। केन्द्रको अधिवेशन भने आगामी निर्वाचनपछि गर्ने प्रस्ताव बहसको केन्द्रमा रहेको छ।
यसअघि कांग्रेसका दुई महामन्त्री गगन थापा र विश्वप्रकाश शर्माले पार्टीको आन्तरिक लोकतन्त्र बलियो बनाउन चुनावअघि नै महाधिवेशन सम्पन्न गर्नुपर्ने अडान लिँदै आएका छन्। तर, वरिष्ठ नेता कृष्णप्रसाद सिटौला र विमलेन्द्र निधिले अहिले देश राजनीतिक संक्रमणमा रहेकाले महाधिवेशनलाई निर्वाचनपछि सार्नु नै व्यावहारिक हुने तर्क गरेका छन्।
संस्थापन पक्षले यस विषयमा मध्यमार्गी नेता डा. शेखर कोइरालासँग पनि निरन्तर परामर्श गरिरहेको छ। कोइरालाले मंसिरमा नै महाधिवेशनको तालिका ल्याएर तयारी सुरु गर्ने र आवश्यक परे केही समय सार्ने लचक उपाय अघि सारेका छन्।
भेलामा सहभागी केन्द्रीय सदस्य रामहरि खतिवडाले पार्टी एकतालाई प्राथमिकता दिनुपर्ने बताए। उनका अनुसार, मुलुक राजनीतिक अस्थिरताबाट गुज्रिरहेको अवस्थामा कांग्रेसले विभाजन होइन, सहमतिको बाटो रोज्नुपर्ने आवश्यकता देखिएको छ।
‘देश संकटमा छ, कांग्रेसको जिम्मेवारी अझ बढेको छ,’ खतिवडाले भने, ‘त्यसैले पार्टीलाई एकताबद्ध बनाउन सबै पक्षबीच संवाद र समन्वय जरुरी छ।’
भेलामा बोल्ने धेरै नेताहरूले महाधिवेशन तयारीलाई संगठन सुदृढीकरणसँग जोड्दै कार्यतालिका चाँडो टुंग्याउन आग्रह गरेका थिए। उनीहरूले क्रियाशील सदस्यता, स्थानीय तहका अधिवेशन र केन्द्रीय नेतृत्वबीचको सहमति बिना पार्टी बलियो बन्न नसक्ने बताएका छन्।
यसैबीच, स्थगित केन्द्रीय कार्यसमिति बैठक बिहीबारदेखि सुरु हुने तयारी छ। उक्त बैठकमा महाधिवेशन तालिका, सदस्यता प्रमाणीकरण, आगामी निर्वाचन रणनीति र पार्टी एकताको विषयमा ठोस निर्णय हुने अपेक्षा गरिएको छ।
कांग्रेसका नेताहरूको बुझाइमा, यदि संस्थापन र परिवर्तन पक्षबीच सहमति जुट्न सके पार्टी आगामी निर्वाचनमा एकजुट सन्देशसहित अघि बढ्न सक्षम हुने देखिएको छ।
Facebook Comments