निर्वाचन आयोगले आगामी फागुन २१ गते हुने प्रतिनिधिसभा सदस्य निर्वाचनको कार्यतालिका स्वीकृत गरेको छ । स्वीकृत कार्यतालिकाअनुसार आगामी मङ्सिर १ गतेदेखि १० गतेसम्म निर्वाचन प्रयोजनको लागि राजनीतिक दल दर्ताको कार्यक्रम तय गरिएको आयोगले जनाएको छ ।
 
आयोगका सहसचिव एवं प्रवक्ता नारायणप्रसाद भट्टराईद्वारा आज जारी प्रेस विज्ञप्तिमा पहिलो हुने निर्वाचित हुने प्रणालीका लागि आगामी माघ २ गतेदेखि निर्वाचन अधिकृतको कार्यालय स्थापना हुने जनाइएको छ । यस्तै, फागुन ३ देखि १८ गतेसम्म निर्वाचन प्रचारप्रसार हुने र तत्पश्चात् प्रचारप्रसार निषेधको अवधि रहने छ ।
 
फागुन २१ गते बिहान ७ बजेदेखि अपराह्न ५ बजेसम्म मतदान हुने र दुवै निर्वाचन प्रणालीतर्फको मतपेटिका सङ्कलन भएपछि मतगणना प्रारम्भ गरिने छ । समानुपातिक निर्वाचन प्रणालीका लागि मङ्सिर १५ गते निर्वाचन अधिकृतको कार्यालय स्थापना हुने, पुस १८ र १९ गते बन्दसूची पेस गर्ने कार्यक्रम रहेको रहेको आयोगका विज्ञप्तिमा उल्लेख छ । 
 
निर्वाचनमा राजनीतिक दल एवं सरोकार भएकाहरूसँगको समन्वय र सहकार्यका लागि स्वीकृत निर्वाचन कार्यतालिकाअनुसार आयोगले समय समयमा परामर्श तथा छलफल गर्ने जनाइएको छ । 
 
आयोगमा दर्ता कायम रहेका राजनीतिक दलले मात्र निर्वाचन प्रयोजनका लागि दल दर्ता गर्न पाउने कानूनी व्यवस्था रहेको हुँदा निर्वाचनमा भाग लिन चाहने सरोकारवालाले आगामी कात्तिक ३० गतेभित्र राजनीतिक दल दर्ताको प्रमाणपत्र लिइसक्नु पर्ने आयोगले जनाएको छ ।

निर्वाचन आयोगले सोमबार सार्वजनिक गरेको निर्वाचन कार्य तालिकामाथि नेपाली कांग्रेसका सूचना, सञ्चार तथा प्रचार विभाग प्रमुख मीनबहादुर विश्वकर्माले प्रश्न उठाएका छन्। आयोगद्वारा सार्वजनिक विज्ञप्तिलाई फेसबुकमा राख्दै विश्वकर्माले प्रश्न उठाएका हुन्। 

ad

‘फागुन २१ गते प्रतिनिधिसभा सदस्यको निर्वाचनको कार्य तालिका भनी विज्ञप्ति सार्वजनिक भएको छ ! कस्तो खाले निर्वाचन हुने ?,’ विश्वकर्माले लेखेका छन्, ‘समानुपातिक उम्मेदवारको बन्द सूचि बुझाउने मिति छ ! प्रत्यक्षतर्फको उम्मेदवारी दिने मिति नै भेटिएन त ?’ 

उम्मेदवार बिना बरु मतगणनाको मिति चाहिँ उल्लेख रहेको विश्वकर्माले लेखेका छन्। ‘नयाँ सरकारको नयाँ चाला हो कि ?,’ उनले प्रश्न गरेका छन्।