नेपालले टप इन्ड टी–२० सिरिजमा लगातार तेस्रो हार बेहोर्दै निराशाजनक प्रदर्शन जारी राखेको छ। सोमबार डार्बिनको टिआइओ रंगशालामा भएको खेलमा मेलबर्न स्टार्स एकेडेमीले नेपाललाई ३१ रनले पराजित गर्यो।
टस जितेर पहिले ब्याटिङ गरेको मेलबर्नले ब्लेक म्याकडोनाल्डको ७४ रन (४७ बल, ७ चौका, २ छक्का) र थोमस रोजर्सको ६५ रन (४६ बल, ७ चौका, १ छक्का) को मद्दतले २० ओभरमा १७५ रन बनायो। यी दुईले दोस्रो विकेटका लागि १२२ रनको साझेदारी गर्दै मेलबर्नलाई बलियो अवस्थामा पुर्याए। नेपालका सन्दीप लामिछानेले ३ विकेट लिएर म्याकडोनाल्डको इनिङ्स १३.१ ओभरमा अन्त्य गरे। सोमपाल कामी र शहाब आलमले समान १–१ विकेट लिए।
१७६ रनको लक्ष्य पछ्याएको नेपालले २० ओभरमा ७ विकेट गुमाएर १४४ रन मात्र बनाउन सक्यो। ओपनर आशिफ शेखले ५३ रन (४९ बल, ३ चौका, १ छक्का) बनाएर टिमलाई सम्हाल्ने प्रयास गरे। कप्तान रोहितकुमार पौडेलले ३३ रन (३१ बल, ३ चौका) जोडे। कुशल भुर्तेल (२५ रन) र कुशल मल्ल (११ रन) ले समेत योगदान दिए, तर मेलबर्नका अस्टिन एन्लेजार्क र डग वारेनको २–२ विकेटले नेपालको ब्याटिङ धराशायी बनायो। आरिफ शेख ८ रनमा अविजित रहे।
यसअघि नेपालले सिरिजको पहिलो खेलमा नर्दर्न टेरिटोरी स्ट्राइकर्ससँग ४२ रन र दोस्रो खेलमा बंगलादेश ‘ए’ सँग ३२ रनले हार बेहोरेको थियो। यो हारसँगै नेपालको सिरिजमा जितको खाता खुल्न बाँकी छ।
Facebook Comments