अस्ट्रेलियाको नर्दन टेरिटोरीमा जारी टप एण्ड टी–२० सिरिजमा नेपालले आज आफ्नो तेस्रो खेलमा मेलबर्न स्टार्स एकेडेमीको सामना गर्दैछ।

डार्विनको टीआईओ स्टेडियममा नेपाली समयअनुसार सवा ७ बजे सुरु हुने यो खेलमा नेपाल जितको खाता खोल्ने लक्ष्यमा हुनेछ। हालसम्म दुई खेलमा पराजय भोगेको नेपाली टोलीलाई यो खेलमा नयाँ रणनीति र उत्साहका साथ मैदानमा उत्रने अवसर छ।

ad

नेपालले सिरिजको पहिलो खेलमा स्थानीय टोली नर्दन टेरिटोरी स्ट्राइकसँग ४२ रनले हार बेहोरेको थियो। दोस्रो खेलमा बंगलादेश ‘ए’ सँग ३२ रनले पराजित हुँदै नेपालले लगातार हारको सामना गर्नुपरेको छ। यी दुई हारले नेपाली टोलीलाई दबाबमा पारे पनि कप्तान रोहित कुमार पौडेल र उपकप्तान दीपेन्द्रसिंह ऐरीको नेतृत्वमा टोलीले आजको खेलमा नयाँ जोशका साथ प्रदर्शन गर्ने अपेक्षा गरिएको छ।

मेलबर्न स्टार्स एकेडेमीले सिरिजमा मिश्रित प्रदर्शन गरेको छ। पहिलो खेलमा मेलबर्न रेनेगेड्ससँग ४ रनले पराजित भएको यो टोलीले दोस्रो खेलमा होबार्ट हरिकेन्सलाई हराएर आफ्नो क्षमता देखाइसकेको छ। स्टार्सको कप्तानी बिग ब्यास लिगका अनुभवी खेलाडी साम हार्परले गरिरहेका छन्, जसले नेपाललाई कडा चुनौती दिन सक्छ।

नेपाली टोलीमा कुशल मल्लको पुनरागमनले टोलीको मनोबल उच्च भएको छ। मल्लको आक्रामक ब्याटिङ र उपयोगी बलिङले टोलीलाई सन्तुलन प्रदान गर्न सक्छ। यस्तै, सन्दीप लामिछानेको स्पिन जादु र करण केसीको तीव्र गतिको बलिङले मेलबर्न स्टार्सको ब्याटिङ लाइनअपलाई दबाबमा राख्न सक्ने सम्भावना छ। रोहित पौडेल, आसिफ शेख र कुशल भुर्तेलजस्ता ब्याट्सम्यानहरूले आजको खेलमा ठूलो स्कोर बनाउन आवश्यक छ।

यो सिरिज नेपालका लागि आगामी अक्टोबरमा ओमानमा हुने आईसीसी टी–२० विश्वकप एसिया तथा इस्ट एसिया प्यासिफिक छनोटको तयारीका लागि महत्त्वपूर्ण छ। नेपालले समूह चरणमा कुल ६ खेल खेल्नेछ, जसमा आजको खेलपछि होबार्ट हरिकेन्स (अगस्त १९), मेलबर्न रेनेगेड्स (अगस्त २०) र पाकिस्तान शाहिन्स (अगस्त २२) सँग प्रतिस्पर्धा गर्नेछ। लिग चरणका शीर्ष चार टोली सेमिफाइनलमा प्रवेश गर्नेछन्।

नेपाल क्रिकेट संघ (क्यान) ले रोहित कुमार पौडेलको कप्तानीमा १६ सदस्यीय टोली घोषणा गरेको छ। टोलीमा दीपेन्द्रसिंह ऐरी (उपकप्तान), सन्दीप लामिछाने, कुशल भुर्तेल, आरिफ शेख, आसिफ शेख, कुशल मल्ल, गुलसन झा, भीम सार्की, रुपेस कुमार सिंह, सोमपाल कामी, नन्दन कुमार यादव, करण केसी, रिजन ढकाल, लोकेस बम र साहब आलम छन्। यो टोलीमा अनुभव र युवा जोशको राम्रो मिश्रण देखिन्छ।

नेपालले आजको खेलमा मेलबर्न स्टार्स एकेडेमीविरुद्ध जित निकाल्दै सिरिजमा आफ्नो सम्भावनालाई जीवित राख्ने लक्ष्य राखेको छ।