काठमाडौं । कीर्तिपुरस्थित त्रिभुवन विश्वविद्यालय (त्रिवि) क्रिकेट मैदानको निर्माण कार्यअन्तर्गत पहिलो चरणको काम एक महिनाभित्र सम्पन्न हुने निर्माण व्यवसायीले जानकारी दिएका छन्। सोमबार संघीय संसदको राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्याङ्कन समितिको टोलीलाई यो जानकारी गराइएको हो।

समितिका सभापति ठाकुर गैरे नेतृत्वको टोलीलाई शहरी विकास मन्त्रालयका सचिव गोपालप्रसाद सिग्देल, मन्त्रालयका सहसचिव चक्रवर्ती कण्ठ, र निर्माण व्यवसायीहरूले कार्यप्रगतिबारे जानकारी गराएका थिए।

ad

जानकारीअनुसार, पहिलो चरणका प्यारापिट र फ्लडलाइटसमेत गरी दुवैतर्फ करिब ८० प्रतिशत कार्य सम्पन्न भइसकेको छ। सचिव सिग्देलले भने, "पहिलो चरणको निर्माण सकिएपछि १० हजार र दोस्रो चरणमा २५ हजार दर्शक अट्ने गरी सिट क्षमता विस्तार गरिने छ। सिट ढलानतर्फ पहिलो चरणमा गर्नुपर्ने १२ मध्ये १० वटा ब्लकको ढलान भइसकेको छ। ढलान सम्पन्न भएका ठाउँमा सिटहरू जडान गरिएको र अन्तिम चरणका १ हजार ७०० सिट भारतबाट आउँदै छन्।"

रङ्गशालामा रातिसमेत खेल सञ्चालन गर्ने उद्देश्यले जडान हुन लागेका छ वटा फ्लडलाइटका लागि जमिनमुनि गर्नुपर्ने सबै कार्य सम्पन्न भएको र भारतबाट तीन वटा स्ट्याण्ड ल्याइसकिएको पनि उनले बताए। त्यसमा जडान हुने ४२० वटा बत्ती युरोपबाट ल्याइँदै गरेको जानकारी गराइएको थियो। रङ्गशाला निर्माणका लागि पहिलो र दोस्रो चरण गरी कुल ६ अर्ब रुपैयाँ लागत अनुमान गरिएको छ।

प्रथम चरणलाई सम्पन्न गरेर नेसनल प्रिमियर लिगको दोस्रो संस्करण त्रिवि क्रिकेट मैदानमै फ्लडलाइटमा खेलाउने लक्ष्य राखिएको छ। संसदीय टोलीलाई जमिनको स्वामित्व रहेको त्रिभुवन विश्वविद्यालयका चासोलाई सम्बोधन गर्नुपर्ने विषयमा पनि जानकारी दिइएको थियो। "लिजमा जमिन लिई क्रिकेट मैदान सञ्चालन गर्न क्यान र विश्वविद्यालयबीच भएको सम्झौता आगामी वैशाखमा सकिने भएकाले त्रिविका चासो सम्बोधन गर्दै छलफल गराउनुपर्ने जानकारी पनि दिएका छौँ," मन्त्रालयका सचिव सिग्देलले भने।

संसदीय टोलीलाई खेलकुद मन्त्रालयका पदाधिकारीका साथै क्यानका सचिव पारस खड्का लगायतले स्वागत गरेका थिए। अनुगमन टोलीमा सभापति गैरेका साथै समिति सदस्यहरू तुलसाकुमारी दाहाल, दीलेन्द्रप्रसाद बडू, देवप्रसाद तिमिलसेना, प्रतिमा गौतम, प्रभु हजारा, बुद्धिमान तामाङ, मदनकुमारी शाह (गरिमा), मोहम्मद खालिद, लासप्रसाद साँवा लिम्बू, शान्ति विक, सन्तोष परियार, र सरस्वती सुब्बा तथा हितराज पाण्डे सहभागी थिए।

अनुगमनपछि सञ्चारकर्मीलाई प्रतिक्रिया दिँदै समिति सभापति गैरेले प्रधानमन्त्री केपी शर्मा ओलीले आफ्नो पदबहालीकै दिन उद्घोष भएअनुसार काम भइरहेको बताए। उनले रङ्गशालाबारे देशभर चासो रहेकाले आफूले त्यहाँ भइरहेको कार्यप्रगतिबारे जानकारी लिएको र प्रतिकूल मौसमका बाबजुद निर्माण कार्य एक महिनाभित्र सम्पन्न हुने दिशातर्फ अघि बढिरहेको पाइएको जानकारी दिए।

क्यान सचिव पारस खड्काले त्रिवि क्रिकेट मैदानले धेरै खेलप्रेमीको सपना बोकेको बताउँदै दोस्रो चरणको एनपिएल त्रिवि मैदानमा फ्लडलाइटमा खेल्ने लक्ष्य पूरा गर्नेगरी काम भइरहेको बताए। साथै देशका विभिन्न स्थानमा नयाँ क्रिकेट मैदानका लागि कार्य सुरु भएको पनि खड्काको भनाइ थियो।