काठमाडौं – टिप्परको ठक्करबाट कैलालीमा एक जनाको मृत्यु भएको छ । पूर्वपश्चिम राजमार्ग अन्तरगत गोदावरी नगरपालिका–६ लालपुरमा बुधबार बिहान सुपप्र ०१००१ क २०२० नम्बरको टिप्परले सुपप्र०१००१ ह ४९१८ को अटोलाई ठक्कर दिँदा अटोमा सवार एक जनाको मृत्यु भएको प्रहरीले जनाएको छ ।

ठक्करबाट अटोमा सवार गोदावरी नगरपालिका–७ का ४ वर्षीय बालक भरत ठकुल्लाको मृत्यु भएको जिल्ला प्रहरी कार्यालयका प्रवक्ता प्रहरी नायब उपरीक्षक वेदप्रकाश जोशीले जानकारी दिए । ठकुल्लाको उपचारका क्रममा सेती प्रादेशिक अस्पतालमा मृत्युु भएको हो । उनकी आमा २९ वर्षीया पेन्टि ठकुल्ला घाइते छन् । अटो चालक २८ वर्षीय मोहन बोहरा समान्य घाइते छन् ।

टिप्पर र चालक धनगढी उपमहानगरपालिका–७ बस्ने ४२ वर्षीय प्रदिप चौधरीलाई इलाका प्रहरी कार्यालय मालाखेतिले नियन्त्रणमा लिएको छ ।
घटनाको विरोधमा स्थानीयले पूर्वपश्चिम राजमार्ग बन्द गराएका छन् । राजमार्ग अवरुद्ध गरेपछि सवारीसाधन चल्न सकेका छैनन् ।