काठमाडौं । चीनको औपचारिक भ्रमण सकेर शनिबार स्वदेश फर्किएकी परराष्ट्रमन्त्री डा‍. आरजु राणा देउवाले चिनियाँ परियोजना ‘बेल्ट एन्ड रोड इनिसिएटिभ’ (बीआरआई)को कार्यान्वयन योजना दुवै देशको सहमतिमै अघि बढ्ने बताएकी छन् ।

चिनियाँ विदेशमन्त्री वाङ यीको मैत्रीपूर्ण निमन्त्रणामा बिहीबार चीनको औपचारिक भ्रमणमा गएकी परराष्ट्रमन्त्री राणबले भ्रमण सकेर शनिबार स्वदेश फर्किएलगत्तै त्रिभुवन अन्तर्राष्ट्रिय विमानस्थलमा आयोजना गरेको पत्रका सम्मेलनमा यस्तो दाबी गरेकी हुन् । मन्त्री राणाले अहिले नेपाल ऋण लिन सक्ने अवस्थामा नरहेकाले चीन सरकारसँग पनि यसै विषयमा कुराकानी भएको स्पष्ट पारिन् ।

‘बीआरआई परियोजनाको फ्रेमवर्कमा नेपालले सन् २०१७ मा नै हस्ताक्षर गरिसकेको छ र अहिले यसको कार्यान्वयनको योजनाबारे कुराकानी भइरहेको छ,’ मन्त्री राणाले भनिन्, ‘यो नेपाल र चीनबीचको सहमति तथा समझदारीका साथै नेपालमा पनि सबैको साझा सहमतिकै आधारमा हुनेछ ।’

‘यो परियोजना अनुदानमा गर्ने भन्ने विषय नेपाली कांग्रेसले औपचारिक निर्णय नै गरिसकेको छ,’ उनले भनिन्, ‘यो जानकारी वर्तमान सत्ता साझेदार दल नेकपा एमालेलाई पनि छ । त्यसैले अनुदानमा नै यो परियोजनालाई अघि बढाउने विषयमा हामीले छलफलहरु गरिरहेका छौँ ।’

मन्त्री राणाले नेपाल र चीनबीच सदियौँदेखि घनिष्ठ एवं मित्रवत सम्बन्ध रही आएको र यो ऐतिहासिक सम्बन्धलाई थप सुदृढ बनाई जनस्तरमा विस्तार गर्न दुई देशबीच समय समयमा हुने उच्चस्तरीय भ्रमणहरुको आदानप्रदानले महत्वपूर्ण योगदान पुर्याउँदै आएको चर्चा गर्दै आफ्नो भ्रमण पनि त्यसैको निरन्तरता भएको बताइन् ।

भ्रमणका क्रममा हिजो (शुक्रबार) चिनियाँ विदेशमन्त्री वाङ यीसँग भएको द्विपक्षीय भेटवार्ता सौहार्दपूर्ण रहेको पनि उनले बताइन् । वार्तामा नेपाल–चीन सम्बन्ध र द्विपक्षीय हितका विविध पक्षका साथै प्रधानमन्त्री केपी शर्मा ओलीको आसन्न चीन भ्रमणको तयारीका बारेमा कुराकानी भएको राणाले जानकारी दिइन् ।