नेपाल प्रिमियर लिग क्रिकेट (एनपीएल) आजदेखि काठमाडौंमा सुरु भएको छ । नेपाल क्रिकेट संघ (क्यान)ले आयोजना गरेको पहिलो संस्करणको एनपीएल त्रिवि क्रिकेट मैदान कीर्तिपुरमा सुरु भएको हो ।

उद्घाटन खेलमा विराटनगर किंग्स र जनकपुर बोल्ट्सले खेल्दै छन् । जनकपुरले टस जितेर बलिङ रोजेको छ । विराटनगरको कप्तानी सन्दीप लामिछाने र जनकपुरको कप्तानी अनिल साहले गर्दैछन् ।

घरेलु क्रिकेटको सबैभन्दा ठूलो प्रतियोगिता एनपीएलमा आठवटा फ्रेञ्चाइज टिम सहभागी छन् । विराटनगर किङ्स, जनकपुर बोल्ट्स, चितवन राइनोज, काठमाण्डौं गुर्खाज, पोखरा एभेन्जर्स, लुम्बिनी लायन्स,कर्णाली याक्स र सुदूरपश्चिम रोयल्सले प्रतिस्पर्धा गर्नेछन् ।

यो खेलको भारतीय चर्चित स्पोर्टस टीभी च्यानल स्टार स्पोर्टसले प्रत्यक्ष प्रसारण गर्दै छ । एक्सन स्पोर्टसको युटुब च्यालनमा पनि खेलको प्रत्यक्ष प्रसारण हुनेछ ।