सगरमाथा आरोहणका क्रममा हिमपहिरोमा परी बेपत्ता भएका तीन जनाको फेरि आजपनि खोजि कार्य सुरु गरिएको छ । बुधवार सगरमाथा आरोहणका लागि बाटो निर्माण गर्न आवश्यक सामग्री पु¥याउने क्रममा आधार शिविरदेखि माथि क्याम्प–१ को बीचमा आइसफल क्षेत्रको दाम भन्ने स्थानमा हिउँको ढिस्कोले पुरिएर दाछिरी शेर्पा, पेम्बा तेन्जिङ शेर्पा र लाक्पा रिता शेर्पा बेपत्ता भएका छन् ।

बेपत्ता भएका तीनैजना इमाजिन नेपाल ट्रेक एण्ड एक्सपिडिसन प्रालिका तर्फबाट खटिएका हुन् । खुम्बु पासाल्हामु गाउँपालिका–५ का स्थानिय रहेका उनिहरुको बुधवार अबेरसम्म खोजी कार्य भएको थियो । तर उनिहरुलाई फेला पार्न नसकेको जिल्ला प्रहरी कार्यालय सोलुखुम्बुले जनाएको छ। आज फेरि सिम्रिक एयरको हेलिकप्टर र स्थलगत मार्गबाट तीव्ररूपमा बेपत्ताको खोजी कार्य भइरहेको पर्यटन विभागले जनाएको छ।