काठमाडौँ । द्वन्द्वकालीन मुद्दाहरुलाई निष्कर्षमा पुर्याउन बसेको प्रमुख राजनीतिक दलहरुको बैठक विनानिष्कर्ष सकिएको छ ।
प्रधानमन्त्रीको सरकारी निवास बालुवाटारमा सोमबार बसेको सत्तारुढ नेपाल कम्युनिस्ट पार्टी (नेकपा) र प्रमुख प्रतिपक्ष दल नेपाली काँग्रेसका नेताहरुबीच भएको छलफल विना निष्कर्ष सकिएको हो ।
छलफलमा सहभागी नेपाल कम्युनिष्ट पार्टी नेकापाका नेता सुवासचन्द्र नेम्वाङले सत्य निरुपण तथा बेपत्ता आयोगबारे बनेको विधेयकका बारेमा सामान्य छलफल भएपनि कुनै निष्कर्ष ननिस्केको प्रतिक्रिया दिए ।
सोमबारको छलफलमा प्रधानमन्त्री केपी शर्मा ओली, नेकपा अध्यक्ष पुष्पकमल दाहाल ‘प्रचण्ड’, काँग्रेस सभापति शेरबहादुर देउवा, ऊर्जामन्त्री वर्षमान पुन र पूर्वसभामुख सुवास नेम्वाङ सहभागी थिए ।
आइतबार पनि नेकपाका अध्यक्षद्वय ओली र प्रचण्डबीच युद्धकालीन मुद्दालाई कसरी निष्कर्षमा पुर्याउने भन्ने बारेमा छलफल भएको थियो ।
बालुवाटार श्रोतका अनुसार सोमबारको बैठकमा रिक्त सभामुख पद पूर्तिका विषयमा समेत छलफलल भएको थियो । यसअघि सत्यनिरुपण तथा वेपत्ता आयोगका लागि विधेयक सरकारले ल्याएपनि आयोगको अध्यक्ष नियुक्ति हुन नसक्दा त्यसबारेको काम कारवाही ठप्प जस्तै बनेको छ ।
प्रतिक्रिया